Bandièra01 1180x150: Comuna de Tolosa

Actualitats

Los independentistas an ganhat las eleccions municipalas en Escòcia

Los trabalhistas, primièra fòrça en Anglatèrra e Galas. Lo conservador Boris Johnson se manten coma cònsol de Londres

| Vilaweb

Lo Partit Nacional Escocés (SNP), del primièr ministre d'Escòcia Alex Salmond, es estat lo partit que mai an votat per el en Escòcia, a las eleccions municipalas de dijòus passat al Reialme Unit. Après ven lo Partit Trabalhista, qu'es estada primièra fòrça en Anglatèrra e Galas. S'agís dels dos partits qu'an obtengut de melhors resultats dins aquelas eleccions ont òm a punit David Cameron e lo govèrn britanic. La soleta consolacion pels conservadors es lo mantenement de la municipalitat de Londres, amb Boris Johnson.


L’SNP a obtengut 424 conselhièrs (57 de mai), un aument considerable. Per contra los trabalhistas an obtengut majoritat absoluda a la municipalitat de Glasgow, una de las vilas principalas del país. Alex Salmond soslinha que la formacion independentista a fach un grand avançament, en atenhent la majoritat absoluda en de municipalitats coma Dundee o Angus. "O avèm fach encara melhor qu'en 2007" a dich, a l'encòp qu'a apondut que la siá formacion a aumentat lo nombre de conselhièrs en essent dins lo govèrn, contràriament a çò qu'es arribat als conservadors e als liberaldemocratas. 
 
Dins la capitala escocessa, Edimborg, l'SNP a obtengut 18 conselhièrs, del temps que los vencedors son estats los trabalhistas, amb 20. Lo Partit Conservador a mantengut los 11 qu'aviá, e los liberaldemocratas an obtengut sonque tres conselhièrs. 
 
Los trabalhistas ganhan fòrça en Anglatèrra e Galas 
 
Lo Partit Trabalhista a obtengut 394 conselhièrs en Escòcia e es estat lo partit que mai an votat per el en Anglatèrra (1188 conselhièrs) e Galas (576 conselhièrs), en obtenent 800 conselhièrs de mai. Après el, lo Partit Conservador a perdut a l'entorn de 400 conselhièrs, e los liberaldemocratas n'an perdut 336. En quatren luòc, en Anglatèrra e en Galas se plaça l’SNP, qu'a ganhat 57 conselhièrs. 
 
Lo conservador Boris Johnson se manten coma cònsol de Londres
 
Los trabalhistas an beneficiat del puniment de part dels ciutadans contra lo govèrn de coalicion britanic. Los "tories" an de se contentar amb  la victòria del conservador Boris Johnson a Londres. Dins la capitala britanica, lo Partit Trabalhista es estat lo segond que mai an votat per el, seguit del Partit Verd, del Partit Liberaldemocrata, de l'eurosceptic Partit Independent del Reialme Unit e de l'ultradrechan Partit Nacional Britanic.
 
Johnson a ganhat just-just contra lo trabalhista Ken Livingstone, qu'a pas pogut acabar de completar lo succès del sieu partit. Ça que la, los trabalhistas an atengut lo contraròtle de l'Assemblada de Londres, lo plen de conselhièrs de l'airal metropolitan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article