Demest las linhas estrategicas qu’a lo gigant de las cèrcas Google, i a l’expansion de l’accès a Internet de naut debit pel Mond. Agrandir lo nombre d’internautas es agrandir lo nombre d’usatgièrs. Dins aquela linha, es pas estranh que l’entrepresa californiana aja començat de perpensar a l’idèa de menar lo wi-fi a las regions remasas d’Africa, mejançant de zepelins, de satellits e de pals de telefòn.
 
Segon lo Wall Street Journal, Google a l’intencion de combinar totas aquelas tecnologias, e tanben las ondas hertzianas emplegadas per la television, per arribar a las zònas subsaharianas que fins ara accedisson pas a l’Internet de nauta velocitat. Amb un zepelin teledirigible, per exemple, se poiriá cobrir de centenats de quilomètres cairats de territòri. Google a ja fach d’assages de ret sens fils a Ciutat del Cap (Sud-Africa), al campus de l’Universitat Stellenbosch.
 
La tòca, segon aquel jornal, es de connectar un miliard d’usatgièrs de mai a l’Internet en de mercats emergents coma Africa e lo sud-èst asiatic, mejançant d’acòrdis amb los regulators governamentals, los operators de telecomunicacions locals e d’entrepresas d’esquipaments.