Bandièra01 1180x150: Comuna de Tolosa

Actualitats

La television del senat francés a explicat los beneficis de l’independéncia de Catalonha

“Fa tròp d’ans que l’estat espanhòl nos oprimís”, çò explica una femna entrevistada del temps que la votz en off apond: “Amb la crisi, las gents dobrisson fin finala los uèlhs” e “totòm es convencut que sens Espanha, Catalonha viuriá melhor”. Public Sénat TV, La television publica del Senat francés, a consagrat dins son programa Europe Hebdo un reportatge de cinc minutas e mièja a analisar lo procès independentista que viu Catalonha. Al reportatge participa lo cònsol de Vic e president de las municipalitats per l’independéncia, Josep Maria Vila d’Abadal, e mai Salvador Cardús, sociològ e membre del Conselh Assessor per la Transicion Nacionala.
 
“Sèm un autre país, un país qu’a pas d’estat”, çò explica Vila d’Abadal. “Nos volèm pas embarrar sus nosautres meteisses, al contrari, [l’independéncia] es la possibilitat de nos dobrir a Euròpa e de parlar d’egal a egal amb Madrid”, çò i ditz Cardús.
 
Lo contraponch es mes per Salvador Guillermo en nom del Foment Nacional del Trabalh, associacion espanhòla de patrons, qu’assegura qu’una Catalonha independenta demorariá en defòra de l’Union Europèa, e alèrta sus un boicòt espanhòl dels produches catalans.
 
Lo reportatge es seguit d’una entrevista amb una deputada bèlga al Parlament Europèu, Véronique De Keyser, que sosca suls nòus procèsses d’independéncia en Euròpa. “Catalonha a una istòria millenària e fins ara s’èran compreses amb Madrid en reclamant de mai en mai d’autonomia, mas la situacion de crisi o a crespat tot”, çò explica.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ramon de Perelha Perelha d'Enaut
3.

Lo president del Senat es JP Bèl, senator ariegés qu'a capitat de far passar las modificacions de lei per la refòrma de l'Escòla Publica, de tal biais que prenga enfin en compte — e mai per tròp pauc — las lengas pègament ditas "régionales". Es qu'i caldriá veire un bocin de ligam ? E se JP Bèl èra lo darrièr socialista ? Lo darrièr republican ? M'o demandi, pas mai. Cresi pas gaire las òmes-providéncia…

  • 0
  • 0
Gapian Gap
2.

Fai plaser de veire aquela emission sus Public Sénat que se parla gaire dau processus d'emancipacion de Catalonha dins los mèdias franceses. Brau !

  • 4
  • 0
Pirolet
1.

Lo Guillermo deu ésser un umorita per aver d'arguments tan flacs e tan falses. Catalonha demorariá, o tornariá lèu lèu, dins l'UE. E un boicòt per Espanha es per rire ja que se dobririá encara mai sul mercat europèu e mondial. Fa ja un moment que lo mercat del cava, que passèt per un ensaig de boicòt, se fa sustot amb los Estats Units. E sabètz que la placas de fonta de las carrièras de Fundició Benítez (que non pas "fundicióN"), las magdalenas e lo foet de Girona, lo formatge del Cadí - e ne passi- arriban ja a l'autre costat de la tèrra?

  • 4
  • 0

Escriu un comentari sus aqueste article