Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaBearnPalés

Los salariats de Las Formatjariás Occitanas en cauma per lor patron

| LAGRIC
Un vintenat de salariats de l’entrepresa Las Formatjariás Occitanas (Les Fromageries Occitanes), de Lons (Bearn), bloquèron l’intrada de la formatjariá ièr dimarts. Se metèron espontanèament en cauma per sosténer lor director, M. Claverie, convocat a la sendença de l’entrepresa a Vilafranca de Lauragués per èsser informat de son licenciament.
 
Dimècres passat un dels obrièrs se feriguèt la man sus una maquina “obsolèta” destinada a lacar los formatges, segon los salariats. En seguida lo director del sit foguèt licenciat. “Li dèren cinc minutas entà prene los sons ahars personaus, rénder lo badge e lo telefòn mobil de l’entrepresa. Non agó pas solament lo dreit d’anar saludar los salariats”, çò disián los caumaires a La République des Pyrénées a prepaus del licenciament de Claverie.
 
“Avèm resultats hèra bons, la produccion es en aument e dus milions son estats investits suu sit”, apondián los salariats en protèsta, “B’ei eth qu’a desmarrat tota l’installacion. Ací, es coma ua familha dab un director qu’estèc tostemps present, tostemps a l’escota. La vetustat de la maquina que hèc ja l’objècte de demandas a la direccion generala en seguida d’un primèr accident. Çò que volèm saber es çò que se prepara. La politica d’amainatjament vien incomprensibla e reclamam transparéncia”.
 
Los salariats son a estudiar cò que ditz la direccion generala de l’entrepresa a Claverie per saber quina seguida daràn a lor movement. “Non es pas un movement sindicau mes un movement deu personau”, çò precisavan los salariats. Aperaquí 60 personas trabalhan al sit bearnés. Los jornalistas de La République des Pyrénées ensagèron de parlar amb la direccion generala de l’entrepresa mas capitèron mal.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Antòni de Siga Levenç
2.

Un faus pretèxte per començar a licenciar sis emplegats ?

  • 6
  • 0
Jacme Tolosa
1.

I a un establiment a Tolosa, avenguda dels Estats-Units.

  • 2
  • 0

Escriu un comentari sus aqueste article