Deu 23 au 28 d’abriu de 2012, liceans angón au sud de la Catalonha, dins la província de Tarragona, ende hèr un escambi basat sus las lengas occitana e catalana. 31 escolans, qu’estúdian le gascon a l’Isla de Baish, e 18 liceans, que hèn de valencian a Elx, se rescontrèn e hascón visitas junts. Èran joens entre 15 e 17ans. Vejón las bocas de l’Èbre, Barcelona, Morelha, Poblet, Santes Creus, Peníscola e Tarragona.
La matiada deu 26 d’abriu integrèn las classas deu licèu de la Sénia. Estoc le parat de comparar les diferents sistèmas educatius en tot insistir sus l’ensenhament deu catalan e de l’occitan. Les escolans de l’Isla de Baish presentèn quauquas vidèos sus aqueste tèma. La region Miejorn-Pirenèus ajudèc aqueste projècte en balhar una subvencion de 6000 èuros ende la realizacion d’aqueras vidèos.
L’ajuda regionala s’explica peu seriosèr e la longevitat deu bessonatge. Dejà es lo dotzen escambi occitano-catalan de liceans entre les gascons tolosans de l’Isla de Baish e les sud-valencians d’Elx. L’iniciativa comencèc dambe l’eurocongrès deus joens hèit a la Val d’Aran en 2001. L’idèa èra de mostrar aus joens la realitat d’aqueste espaci occitano-catalan. Amassas se hascón a Leucata, L’Isla de Baish, Elx, Turin e Barcelona.
Mès l’essenciau deu sejorn èran pas dins las visitas, mès quand les escolans se retrobavan dins l’otèl de Cambrils on passèn una setmana junts e on avón le temps de conéguer o de se divertir tots amassas. Le succès deu sejorn se podoc notar a la fin on estón quauques uns a plorar a l’ora de la partença.
Après, cau estar realista : las lengas qu’emplègan les nòstes joens entre eres estón sustot le francés, le castelhan e l’anglés. L’occitan e le catalan estón plan presents çaquelà. Mès nos poderem demandar legitimament si aqueras lengas seràn mès qu’un marcaire d’identitat end’eres. Pr’aquò, aquera trobada estoc una iniciacion, o benlèu una revelacion, ende una part deus liceans. L’existéncia d’Occitània o de Catalonha es una evidéncia au jorn d’auèi ende aqueres joens gascons e valencians. Ara cau deishar lo temps que tot cresca.
Nicolau Rei Bèthvéder
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari