Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Emergéncia en Aran peth desbordament dera Garona

Quauqui vesins evacuadi en Vielha, Tredòs, Arties, Bossòst, Les, Hòs e Sant Beat. Talhat er accès per carretèra. Luishon isolat. Alèrta de creishudes en Bearn e Bigòrra

| @arantec
Un dia dempús dera hèsta nacionau d’Aran, mercada peth 700au anniversari dera Querimònia, es fòrtes ploges e era grana quantitat de nhèu acumulada enes montanhes araneses qu’an portat eth país a ua situacion d’alèrta grèva.
 
Era enòrma creishuda des arrius, sustot dera Garona, an isolat era Val d’Aran per carretèra. En bèth tram era Garona arribe a hèr 150 m de larg e era situacion ei a vier mès grèva, segontes a explicat eth Sindic d’Aran, Carlos Barrera, as televisions e ràdios de Catalonha. Es autoritats parlen de situacion perilhosa.
 
Aguesta situacion a hèt a talhar era carretèra N230, espina dorsau deth país e es accèssi, tant de Comenge coma deth sud peth tunèl de Vielha. Eth transpòrt escolar ei estat suspenut e i a agut evacuadi en Tredòs, Arties, Vielha, Bossòst e Les.
 
Eth Sindic d’Aran, Carlos Barrera, qu’a parlat d’ua situacion caotica, e a ja anonciat qu’es damatges seràn fòrça grani, en tot tier en compde qu’era prevision ei de mès ploja ena Val d’Aran.
 
Segontes eth Centre de Coordinacion d’Emergéncies de Catalonha, i a peth moment 310 persones deslotjades e quauqui campings se pòden veir afectadi. Eth camping  Verneda ei ja estat evacuat.

Peth maitin 4400 cases son sense electricitat. Era companhia d'electricitat ei en tot trabalhar e en aguest moment ja ei restablida ena majoritat de lòcs.

Es vesins d'Aties son estats deslotjats e aculhudi en en Parador de Torisme o ena glèisa. Era fòrça dera aigua s'a emportat quauques cases, eth pont sus era Garona, era bastissa deth camping e es bungalows. Es ossi que i auie deuant deth burèu de torisme son estats transportadi. Arties ei, damb Vielha, Tredòs, Les e Bossòst un des pòbles mès afectadi. Toti es pòbles dera Val son encara incomunicadi.

Les ei sense electricitat, ne gas; era Garona s'a emportat es conduites. Tota era populacion ei estada evacuada.


Pòur pera creishuda der arriu Nere en Vielha

Eth baile de Vielha e Mijaran, Àlex Moga, alertaue ja aguest matin qu’eth cabau der arriu Nere auie tanben pujat exponenciauments e qu'ere perilhós. Fin finau non a calgut evacuar quauqui 400 vesins deth centre istoric de Vielha coma mesura de precaucion.
 
En declaracions ara ACN, Moga a explicat qu’era Garona ei “entièraments desbordada” en tot Aran e en Vielha toti es pònts son barradi. Enquia ara, es inondacions an arribat a cases, botigues e s’an emportat es bungalows de bèri campings. Ath delà, fòrça vesins non an electricitat ne aigua potabla. Eth baile avertís a toti que demoren en casa pr’amor qu’eth perilh ei fòrça anautit.
 
Damb er arriu Garona desbordat en fòrça punts, era situacion ei complicada en Aran, e era prevision ei que plòigue mès e damb intensitat.
 
Se se desbòrde er arriu Nere es inondacions serien fòrça grèves. Peth moment toti es pònts son barradi e er aigua passe per dessús.
 
Eth gabinet de crisi ei amassat entà analisar era situacion e mercar es accions.


Es pònts queiguts

De Naut Aran mos repòrten a Jornalet qu'eth municipi e ei sense electricitat. Ath delà eth testimoniatge mos conde qu'era Garona s'a emportat es caravanes deth camping era Yerla d'Arties. En Casarilh an pòur qu'era aigua e s'empòrte ues cases.

Era Garona a tombat es pònts d'Arties, Salardú e Escunhau e un pònt en Vielha.


Lusihon isolat, Bigòrra e Bearn en alerta de creishudes

Garona enjós quauques centenats de persones èren ja evacuades entàs 12h30 en Sant Beat, Banhèras de Luishon, Sales e Pratvièlh e Hòs, a on a sautat un pont e era aigua s'a emportat es animaus. Ara ora d'ara tota era poblacion ei estada evacuada per tèrra e aire.

Luishon ei isolat, tant pera val coma peth Portilhon. Es carretères RN125, RD46, RD618A e RD27C son estades barrades

En Lorda qu'an barrat eth santuari. Era Tuta de Massavièlha ei submergida pes aigües deth Gave, e eth risc de crescuda ei maximau.De hèt Bigòrra e Bearn son en alèrta maximau.




FM

Mès informacions

Imatges e vidèos


Bossòst



Era Garona en tot passar per Arties

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Halhèr Les
6.

#5 Jo legisqui:

Lusihon isolat, Bigòrra e Bearn en alerta de creishudes

Garona enjós quauques centenats de persones èren ja evacuades entàs 12h30 en Sant Beat, Banhèras de Luishon, Sales e Pratvièlh e Hòs, a on a sautat un pont e era aigua s'a emportat es animaus. Ara ora d'ara tota era poblacion ei estada evacuada per tèrra e aire.

Luishon ei isolat, tant pera val coma peth Portilhon. Es carretères RN125, RD46, RD618A e RD27C son estades barrades

En Lorda qu'an barrat eth santuari. Era Tuta de Massavièlha ei submergida pes aigües deth Gave, e eth risc de crescuda ei maximau.De hèt Bigòrra e Bearn son en alèrta maximau.

  • 1
  • 0
ròdrigò bigòrra
5.

qu'ei plan triste pera vath d'aran segur,mes que sòi espanta de veger qu'eths jornalistas deth jornalet non parlan pas brica dera Bigòrra dab Lorda e tota era vath deth Lavedan negada e dera vath deras Nestas negadas tanben enas hautas pireneas que i a 1800 personas desplaçadas pormor deths aigats,copaduras d'electricitat camins copats taben,ah b'ei vertat! ç'am par nosautis n'em pas en occitania mès en Gasconha.

  • 0
  • 4
Pirolet
4.

Occitans de pertot amb los araneses!

  • 9
  • 0
Josep Fornells de la Selva
3.

Perdoneu que no escrigui aranès, però l'entenc quan el llegeixo i m'agrada.
Ànims. Us en sortireu d'aquest aiguat i aviat tornareu a tenir el país endreçat.
Aquest estiu vinent tornarem a visitar-vos i farem estada a la vostra terra durant les vacances.

  • 5
  • 0
Sèmbola
2.

Solidaritat pan occitana ambals araneses que patísson dals desbordaments !

  • 14
  • 0

Escriu un comentari sus aqueste article