Bandièra01 1180x150: Comuna de Tolosa

Actualitats

Comença uèi la Mòstra de Cinèma Occitan amb mai de vam que jamai

L’inauguracion se fa a Lhèida (Catalonha) e aqueste estiu virarà pel país nòstre

La mòstra comença amb la projeccion del longmetratge “Lenga d’amor” de Patric La Vau.
La mòstra comença amb la projeccion del longmetratge “Lenga d’amor” de Patric La Vau.
La seisena edicion de la Mòstra de Cinèma Occitan s’inaugura uèi a Lhèida (Catalonha), amb la projeccion del longmetratge Lenga d’Amor e la preséncia de son director, Patric La Vau.
 
La Vau es un cineasta independent, qu’a collaborat amb de mèdias coma la BBC e National Geographic. Es especialista en produccion amb camèra digitala, e organizaire del festenal audiovisual Las Nueits Atipicas (Les Nuits Atypiques) a Lengon (Vasadés).
 
Lenga d’Amor, recuèlh lo trabalh sus la memòria occitana. Coma novetat, dins cada vila ont se passarà i aurà una seleccion de filmes desparièrs per s’adaptar a la diversitat dels publics.
 
La Mòstra es arribada a la seisena edicion e ongan serà exibida en dètz e nòu vilas, uèch de mai qu’arunan. Son de soslinhar Vielha, Rodés, Tolosa, Montalban, Bordèu e Ostana; e del costat catalan Barcelona, Lhèida, Cassà de la Selva e La Sèu d’Urgèl. A Rodés coïncidirà amb l’Estivada.
 
La Mòstra de Cinèma Occitan ofrís cada annada una vision panoramica de la lenga occitana a travèrs de las creacions audiovisualas. Quant als genres, i predomina lo documentari, entre d’autras formas d’expression cinematografica.
 
Organiza la Mòstra lo Departament de Cultura de la Generalitat de Catalonha, amb la collaboracion d’institucions e d’entrepresas catalanas e occitanas que ne facilitan la preséncia en territòri occitan e catalan. L’objectiu es de promòure la coneissença de la realitat de la lenga occitana en Catalonha e de n’impulsar la creacion cinematografica.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

antinacionalistas
2.

seriá plan de s'entresenhar suls filmes abans d'escriure bestièsas ! "Lenga d'amor" es pas un reportatge sus Gasconaha mès sus una part de Dordonha... Coma legeire, vos demandi un pauc de rigor sul fonse e sus la fòrma que le nivèl de lenga es plan sovent bravament malaürós !

  • 0
  • 0
Lo Veseor Gordolon ciutat
1.

dona envèia d'anar veire tot aquò !

  • 1
  • 0

Escriu un comentari sus aqueste article