Bandièra01 1180x150: Comuna de Tolosa

Actualitats

crotz-tolosaCreated with Sketch.DaufinatBas DaufinatDiés

An expulsat un jove malian a la velha d’un examen escolar

Lo licèu Armorin de Crest (Diés)
Lo licèu Armorin de Crest (Diés) | Le Dauphiné
Lo jove Cheikh Kouyaté, de 18 ans, foguèt arrestat dins un tren entre Pau e Tarba lo 9 de junh passat segon d’informacions de Le Dauphiné. Kouyaté fasiá sos estudis al licèu Armorin de Crest (Diés) e tornava de far un estagi d’entrepresa dins una societat de Pau (Bearn). Lo crime: èsser pas francés.
 
Kouyaté foguèt menat al centre de retencion d’Hendaia (Bascoat) e dissabte passat foguèt expulsat a Bamako (Mali).
 
Èra escolarizat a Crest dempuèi dos ans, que i fasiá sos estudis de comptabilitat. Èra considerat un bon escolan, seriós e respectuós.
 
“Sabiái pas qu’èra en situacion irregulara sul territòri francés, mas sabiái que vivassava un pauc”, çò disiá al jornal dalfinenc Lydia da Silva Reis, sa professora d’anglés, qu’apondiá que lo jove Cheikh “èra un escolan seriós, atentiu e trabalhaire”. “Sèm fòrça afectats que siá estat expulsat”, çò disiá encara la professora, que capitèt de parlar amb el per telefòn après sa detencion: “M’a dich que voliá obténer son visat per tornar en França e passar son bachelierat. Amb mos collègas, ensajam de veire cossí nos podèm mobilizar per ajudar sa demanda de visat”.
 
Cheikh Kouyaté aviá un contracte “jove major” de l’ajuda sociala a l’enfança, un dispositiu reservat als majors d’edat de mens de 21 ans qu’an de dificultats.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid
1.

E ben... Urosament qu'avem un govèrn de gaucha!

  • 1
  • 0

Escriu un comentari sus aqueste article