Bandièra01 1180x150: Comuna de Tolosa

Actualitats

crotz-tolosaCreated with Sketch.Gasconha

Damatges en Aran, Comenge e Bigòrra

Bossòst
Bossòst | Ajuntament de Bossòst
Que calerà 4 milions d’èuros solament entà arrecuperar totes es carretères e camins dera Val d’Aran, segontes a estimat eth Sindic deth país, Carlos Barrera. Cau encara avalorar es damatges enes cases, comèrcis e sector toristic. Era vicepresidenta de Catalonha, Joana Ortega, que visitèc agèr eth país e se mostrèc impressionada pes damatges.
 
Es bailes que demanen ajudes urgentes e es otelèrs que se trèigue era taxa toristica aumens dus ans. Ath delà, fòrça ciutadans considèren que calerie declarar eth país zòna catastrofica entà qu’arriben lèu es ajudes economiques des administracions.
 
Un des pòbles mès afectadi pes aigües ei Arties, amassa damb Les que, totun, a anonciat qu’enguan tanben s’alucarà eth Haro, entà mantier er esperit fòrt des aranesi. Garona enjós, b’ei Sant Beat ei era vila que mès damatges a patit, en èster completaments negada.
 
En Bigòrra an mòrt dues persones. Ua hemna de 62 ans, qu’auie estat evacuada de cò sòn en Pèirahita e Nestalàs (Lavedan), que volguèt tornar tà arremassar quauquarren e era aigua se l’emportèc. Tanben moric un òme de 75 ans a Lus e Sent Sauvaire (Lavedan).
 
Fòrça poblacions de Comenge e de Bigòrra son estades evacuades, quauques ues encara son incomunicades.
 
Eth ministre francés der Interior, Manuel Valls, qu’a hèt ua crida ara poblacion entà que sigue “fòrça prudenta” e qu’a exprimit eth sòn desir que se declare zòna catastrofica es airaus pirenencs afectadi pes inondacions.
 
Era ploja qu’a tanplan estonat as fidèus qu’èren en Lorda. Era creishuda subta deth Gave de Pau, que trauèsse era ciutat, b’a obligat a barrar era tuta de Massavièlha qu’a demorat entièraments negada pes aigües e qu’a calgut evacuar ara gent que i auie en santuari.




FM
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article