Bandièra01 1180x150: Comuna de Tolosa

Actualitats

Vers la desnuclarizacion dau Japon

I a pus de reactors en activitat e sabem pas quand tornaràn foncionar

Centrala de Tomari, Japon
Centrala de Tomari, Japon | Mugu-shisai

Dissabde passat, lo darrier reactor nuclear en activitat au Japon es estat aplantat per 71 jorns de mantenéncia e benleu tornarà pas foncionar. Seriá la debuta d'una novela politica energetica per l'archipel?


Lo reactor Tomari 1, sus l'isla d'Hokkaido dins lo nòrd dau país es barrat per inspeccion dempuei lo 5 de mai. Era lo darrier daus 54 reactors japonés en activitat dempuei la catastròsfa de Fukushima. Adonc, ne'n i a pus en activitat e sabem pas quand tornaràn foncionar. D'efiech, en seguda a la catastròfa de Fukushima, lo governament demandet de sometre l'ensems de las installacions nuclearas dau país a daus tests de resisténcia davant de las tornar desmarrar. De las manifestacions se debaneron a Tòquio, per festejar quel arrest e contra la possibla represa de l'activitat de las centralas nuclearas.

Lo nuclear representava 30% de l'energia electrica consumida au Japon davant lo tsunami. Las companhiàs fornisseiras d'electricitat degueron trobar d'autras sorsas energeticas coma lo gas e lo petròli. Mas l'importacion massiva d'idrocarburs provoquet una degradacion duradissa de la balança comerciala japonesa, que coneguet en genier 2012 son deficit lo mai important dempuei 33 ans. E mai las companhiàs son a aumentar la tarifa per l'usatgier. Pertant, per Kansai Electric, l'operator de l'oest dau Japon, quelas importancions seràn pas sufisentas per respondre a la demanda : segon la companhiá, de las copaduras d'electricitat son de preveire queste estiu.
 
Maugrat la situacion economica e las copaduras possiblas, las regions e localitats pròchas de centralas aiant passat emb succès los tests de resisténcia, las vòlon pas veire tornar foncionar. Entau Osaka, tresesma vila dau país, demanda lo quite desmantelament de la centrala d'Oi, pertant segura segon l'Agéncia japonesa de Seguretat Nucleara.
 
Lo governament japonés es fàcia una crisi tan politica, qu'energetica e economica. Se deu trobar lo chamin per satisfar la demanda electrica dau país en tot ben pesat las riscas qu'indutz l'energia nucleara. L'i trabalha per queste estiu.



Maime Caillon

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article