Bandièra01 1180x150: Comuna de Tolosa

Actualitats

Le hestenau Escota e Minja que hesteja son detzau anniversari

Le hestenau de L'Isla de Baish se debanarà deu 4 au 7 de julhet dambe Forrocitania, Clica Drona, Lou Seriol, Souste e Alidé Sans

Le hestenau Escota e Minja de l’Isla de Baish (Savés) se debana dumpèi dètz ans la prumèra dimenjada de julhet. Le nom d’aqueth hestenau de la region tolosana veng d’ua idea simpla: hè minjar las gents en tot les hèr escotar musicas e cantas. Las associacions esportivas de la vila perpausan menuts (5 tauladas de 400 personas), e l’associacion Escota e Minja s’ocupa de la programacion musicala.
 
Enguan, en 2013, serà les dijaus 4, divendres 5, dissabte 6 e dimenge 7 de julhet, dambe ua programacion remirabla: Forrocitania, Clica Drona, Lou Seriol, Souste e si tot va plan dambe la participacion d’Alidé Sans.
 
L’associacion qu’organiza aqueth hestenau, ensaja de hèr avançar l’occitan dins la ciutat de l’Isla de Baish. Dumpèi siès ans, cada annada, placas bilinguas son inauguradas. Ara, i a pas mens de 20 placas bilinguas dins aquera petita vila deu Gèrs de 8000 poblants.
 
Cada an, en mès deu hestenau, organizan tres concorses: un concors de navèras, un concors de bendas dessenhadas e un concors de minifilme, tot en occitan. Aqueth darrèr concors vetz dumpèi annadas la crèishença deu joen realizator de la seria d’Occitana Jones: Celtill Jalaber. Le Celtill que filmarà enguan la totalitat deu hestenau ende sortir un DVD l’an que veng.
 
L’associacion hè dons de libes en occitan a la bibliotèca municipala e trabalha dambe ràdios localas ende encoratjar la difusion d’artistas occitans. Es a l’origina de la creacion d’un còr polifonic tradicionau. En Genièr 2013, un cors d’occitan a dravit e òm compta un quinzenat d’escolans.
 
Cada an entre 4000 e 6000 personas venguen au hestenau Escota e Minja. La serada deu dijaus es ua serada literaria e culturala dambe la remesa deus prèmis deus tres concorses. La serada deu divendres, es ua serada populara de petita importància dambe ua restauracion limitada a 300 cobèrts e dambe Forrocitania ende la musica.
 
La jornada màger d’aqueth hestenau es le dissabte dambe l’inauguracion de las placas bilinguas, un talhèr de danças tradicionalas, ua encontra de còrs polifonics e plan segur ua serada memorabla dambe Clica Drona, Lou Seriol e Souste. Le dimenge, ua messa es dita en occitan en la collegiala per l’Abbat Passerat, un aperitiu seguís e acaba le hestenau.
 
Endeus dètz ans d’aquera associacion, un CD que sortís. Conteng 20 tròces musicaus d’artistas que venguèren au hestenau. Òm i trobarà gropes occitans plan coneguts: Du Bartas, La Mal Coiffée, Goulamas’k, La Talvera, Le Bal Brotto-Lopez, Coriandre, CEB ( èx-Montanha Negra), La Confrérie des Souffleurs, Tèrces. Òm i trobarà gropes de cultura occitana e d’expression francesas: Sangria Gratuite, Les Landa’s, Les Barbeaux, Les Fussoirs, La Main Gauche e plan segur Souste, le grope qu’es a l’origina deu hestenau. Òm i trobarà gropes d’autas culturas: Marcel Agace les Filles, Joséphine e Harry Vedercho.
 
Mès d’entresenhas suu sit d’Escota e Minja, e tanben sus Facebook.




Olivèr Berard

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pèir Bigòrra
5.

#4 Que'm sembla qu'eth gascon deth Savés que manteng era -N- intervocalica alavetz no'm pareish pas èster ua barbaritat "hestenau" en aqueth parlar de Gasconha tolosana, ja que s'emplèga de mes en mes a nosta, ena Gasconha pregonda, mentre que "hestejada" o "hestau" sién eras nostas formas patrimoniaus.

  • 3
  • 0
BOURDON Pau
4.

"Hestenau", aqueth mot n'existeish pas en gascon. Lo lengadocian "'festenal" n'a pas nada transformacion fonetica en passant au gascon (cf. article de D. Sumien de ger). Mes lo gascon qu'a tanben autes mots: hestau e hestejada.

  • 1
  • 1
Pèir
3.

Petit hestenau que hè lo son camin: òsca a Escota e Minja ! Coma tostemps, be i a ua programacion de las bèras ! Qu'ei tanben ua beròia faiçon de començar las vacanças ! Bon aniversari alavetz a Escota e Minja !

  • 3
  • 0

Escriu un comentari sus aqueste article