Bandièra01 1180x150: Comuna de Tolosa

Actualitats

Edward Snowden a quitat Hong Kong

Es a Moscòu abans d’arribar a sa destinacion finala que poiriá èsser l’Eqüator

Lo ciutadan estatsunidenc Edward Snowden, acusat d’espionatge pel Govèrn dels Estats Units, a quitat Hong Kong a destinacion de Russia, ont deu far escala presumidament, abans d’arribar a sa destinacion finala que poiriá èsser l’Eqüator.


Segon lo ministre dels Afars Estrangièrs eqüatorian, Ricardo Patiño, Snowden a demanat l'asil a l’Eqüator.
 
Snowden s’èra amagat dins l’anciana colònia britanica d’Hong Kong, après aver fachas publicas d’informacions sus las operacions secretas d’espionatge qu’afèctan los usatgièrs d’Internet e que las organizan los Estats Units e lo Reialme Unit. Ièr dimenge, quitèt la vila chinesa e viatgèt cap a l’aeropòrt de Sheremetevo, a Moscòu.
 
Un tribunal estatsunidenc acusèt divendres passat Snowden de “panatòri de proprietat del Govèrn, comunicacion non autorizada d’informacion de defensa nacionala e comunicacion deliberada d’informacion classificada de comunicacions d’intelligéncia a de personas non autorizadas”.
 
Las autoritats estatsunidencas son a negociar l’extradicion del jove de 29 ans e, segon The Washington Post, an emés un òrdre de detencion provisòria.
 
Los documents amassats e publicats per Snowden als jornals The Washington Post e The Guardian explican en detalh de nombrosas operacions secretas de vigilància, menadas per las autoritats estatsunidencas e britanicas en de rapòrts confidencials, de memòrias e d’òrdres judiciaris. Lo quite Snowden, dins una entrevista concedida a The Guardian, confessèt qu’es el que faguèt publicas aquelas operacions.
 
Aqueles documents corroborèron la demanda d’informacion e de donadas apertenent a de desenats de milièrs d’usatgièrs de tot lo Mond; es una demanda d’informacion que se faguèt a d’entrepresas tecnologicas coma Google, Apple e Facebook. E tanben confirmèron l’espionatge dissimulat dels membres de las delegacions dels païses que participavan a la reünion de las 20 principalas poténcias mondialas, a Londres, en 2009.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Elia Montluçon
2.

Còsta char de dire la veritat. Va paiar tot sa vida per aiçò. Una vida fotuda e una vida novèla a començar... per èstre tranquil dins un mond de mensongiers.

  • 0
  • 0
pessamessa siverga
1.

un bèu joven'aquel espion d'internet ! ara, me sembla lo mot panatori es una creacion à oartir de panar,especific a l'occitan centrau. lo mot raubar es universau -en provençau, avèm escanar qu'ei locau e lo raubatori es lo vocable adequat. teodore Aubanel a escrich un drama "lou raubatori" a partir d'una tradicion nostra quand dos jovents s'amavan e que lei parents lei viliàn pas maridar, se raubavan e sieis mes après reapareissiàn e aquest cop lei maridavan. se Mirelha e Vincens s'èran raubats, la pequeleta serià pas morta , pecaire

  • 3
  • 1

Escriu un comentari sus aqueste article