Bandièra01 1180x150: Comuna de Tolosa

Actualitats

crotz-tolosaCreated with Sketch.GuianaAgenésNaut Agenés

Lo candidat de l’UMP, Jean-Louis Costes, a ganhat l’eleccion legislativa parciala a Vilanuèva d’Òlt

Jean-Louis Costes
Jean-Louis Costes | jeanlouiscostes.fr
Lo candidat Jean-Louis Costes (UMP) a ganhat l’eleccion legislativa parciala de la 3a circonscripcion del departament d’Òlt e Garona (Agenés, Brulhés e Labrit). Costes a ganhat lo sèti de deputat amb 53,76% dels vòtes davant son adversari Étienne Bousquet-Cassagne (Front Nacional) que n’a atench 46,24%.
 
L’escrutini a Vilanuèva d’Òlt (Naut Agenés), principala vila de la circonscripcion, s’es debanat davant un nombrós public. Aperaquí 700 personas èran presentas en seguir l’eveniment.
 
Jean-Louis Costes, cònsol de Fumèl (Naut Agenés), succedís a Jérôme Cahuzac dins aquela circonscripcion.
 
Lo candidat del Front Nacional (FN) parlava ièr d’“una desfacha del gost de victòria”. “Sols contra totes, progressam de manièra considerabla, çò qu’es un bon auguri pels enjòcs electorals avenidors”, çò apondiá Bousquet-Cassagne, del temps que recebiá las felicitacions de Marine Le Pen per telefòn. Dins aquel instant un jornalista de l’AFP constatava de lagremas d’emocion del candidat ultradrechan.
 
De son costat, Jean-Louis Costes considerava qu’“es pas estat absoludament ganhat d’avança” e remarquèt que lo naut resultat de l’FN èra “un messatge enviat a la classa politica, e sustot a la politica economica del govèrn que fa d’estralhs”. Mercegèt tanben los electors d’esquèrra “d’aver votat per nòstra candidatura e de non aver pas causit sus aqueste territòri un deputat del Front Nacional”.
 
Lo govèrn francés reconeguèt sa desfacha dins aquela eleccion ja lo 17 de junh passat, après los resultats del 1r torn, ont lo Partit Socialista foguèt eliminat. “Temiái aquela situacion. Coma mai d’un, ai viscut amb dolor la descobèrta de la messòrga de Jerôme Cahuzac e temiái que causèsse de problèmas prigonds”, çò declarèt alavetz lo primièr ministre francés Jean-Marc Ayrault.
 
L’eleccion parciala legislativa èra estada convocada per elegir lo remplaçant del deputat socialista Jérôme Cahuzac, èx-ministre del Budget, imputat per fraudariá e expulsat del govèrn.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gèli Grande Lairac en Agenés
2.

#1
Pel primièr vòte lo Partit Occitan sostenia los que se fasian portar per EELV e i avia quicòm de clarament marcat per Occitània per un còp.
En Òlt e Garona sèm fòrça ocupats pel Manifèste Occitanista e las eleccions municipalas de 2014

  • 1
  • 0
Elia Montluçon
1.

Un partit francés de drecha còntra un partit francés d'extrèma drecha... I a pas de partits occitanistas dins lo caire ?

  • 1
  • 0

Escriu un comentari sus aqueste article