Fotbòl. Liga 1: Montpelhièr mesprèsa la pression
 
Totes los candidats al títol esperavan arser un maissant resultat dels eraureses. Aprèp lo rampèl sulfurós contra Evian de dimars passat, los montpelhierencs avián de mostrar una autra cara. S'i manquèron pas: sens Belhanda ni Estrada, fàcia a una esquipa de Rennes encara en corsa per Euròpa, los òmes de René Girard trantalhèron pas. Las primièras ocasions foguèron bretonas, cèrtas, mas ongan Montpelhièr sap corbar l'esquina, resistir e trobar las duberturas quand se presentan. Aital, Camara trobèt la gàbia (26a minuta) e desliurèt son esquipa. A comptar d'aquí, l'MHSC contenguèt las atacas bretonas, amb una bèla fòrça de caractèr. Contra çò esperat, lo Stade Rennais tornèt de la pausa sens conviccion. E tant que Costil marquèt contra son camp, per balhar l'avantatge definitiu als eraureses. Coma sovent ongan, Montpelhièr faguèt pròva d'una granda mestresa, e passèron l'espròva sens dificultat. Tornan prene lo cap del classament, amb tres ponches d'avança sus París, e melhoran quitament la diferéncia de gòls. L'encontre contra Lilla, dimenge que ven, serà decisiu e poiriá consagrar l'MHSC en cas de desfacha parisenca.
 
 
Tolosa-Niça: lo rampèl còsta car
 
Arser lo TFC se saupèt pas tirar d'una esquipa niçarda confla d'ambicions, que luchèt sens relambi per son manten. Lo Gim es lo vertadièr ganhant d'aquel encontre, subretot quand veson los resultats dels concurrents de bas de classament: prene un ponch a l'Stadium èra necessari per consolidar l'avança suls relegables. L'objectiu es capitat, e mai, los aglons pòdon quitament arcastar de tornar pas amb mai qu'aquò, vista la fin de partida tota a lor avantatge. Per Tolosa, los espèrs de jogar Euròpa s'esvanisson cada setmana mai, que dins aquela amira los violets son davançats ara per quatre esquipas. S'apren a un mes d'abril catastrofic (una sola victòria pels sèt darrièrs encontres) que costarà car, aquò segur, dins la correguda a l'Europa League.
 
 
Bordèu a fum!
 
Fàcia a una AJ Aussèrra qu'aviá grand mestièr de ponches per se salvar, Bordèu se presentèt al complet, e sul vam de doas victòrias a de reng. Estatisticament, la performança dels Girondins foguèt extraordinària, arser. Tanlèu començada la partida, Gouffran dubriguèt la marca (17a segonda!), e doblèt l'escart a la cinquena minuta. Aussèrra, completament despistada, encaissèt quitament un tresen gòl a la novena minuta (un còp de cap de Sané). La partida èra plegada, que pas jamai los borguinhons s'i poguèron tornar. D'aitant mai que Plasil ajustèt encara un gòl en sortir dels vestiaris. Mas ongan, res es pas simple pels Girondins e se, verai, anèron pas fins a tremolar, Aussèrra capitèt de marcar, dos còps. Amb las experiéncias recentas de rampèls en tota fin de partida, los suportaires podián crénher çò pièger. Mas lo costum èra tròp ample per Aussèrra. La marca cambièt pas mai, e los borguinhons an un bon pè en Liga 2, ara. Per Bordèu, los sòmis son matematicament autorizats, mas a l'ora del bilanç, las errors de concentracion e las peguesas defensivas comesas tota l'annada poirián dòler fòrt.
 
 
Marselha tacanha Sant Estève
 
Se Marselha a pas mai d'ambicion ongan, es pas çò meteis pels Verds, qu'espèran encara Euròpa. D'aquela partida contra un OM en crisi prigonda malgrat la victòria contra Nancí dimècres, l'ASSE pòt arcastar fòrça. Mestregèron la partida, sens contestacion, toquèron la barra, passèron sovent las linhas de darrièr marselhesas (Aubameyang semblèt de se passejar, mantes còps, dins l'esquina de Fanni e Nkoulou), mas demorèron sens marcar. En granda partida mercés a Mandanda, lo melhor marselhés de la partida (e benlèu de la sason), decisiu sus sa linha.
 
Los resultats:
 
Rennes – Montpelhièr 0-2; Lion – Brèst 1- ; Evian TG – Ajaccio 2-1; Valencianas – París 2-4; Lilla – Can 3-0; Sant Estève – Marselha 0-0; Tolosa – Niça 0-0; Aussèrra – Bordèu 2-4; Sochaux – Nancí 1-0; Lorient – Dijon 0-0.
 
 
 

	Esquipa	Pts	J	G	R	P	Bp	Bc	Dif
1	Montpelhièr HSC	76	36	23	7	6	65	33	32
2	París SG	73	36	21	10	5	70	40	30
3	LOSC Lilla Metropòli	71	36	20	11	5	68	37	31
4	Olimpic Lion	60	35	18	6	11	57	45	12
5	Stade Rennais	57	36	16	9	11	48	41	7
6	AS Sant Estève	57	36	16	9	11	45	39	6
7	Girondins de Bordèu	55	36	14	13	9	49	39	10
8	Tolosa FC	55	36	15	10	11	36	31	5
9	Evian TG FC	49	36	13	10	13	52	50	2
10	Olimpic de Marselha	45	36	11	12	13	42	40	2
11	AS Nancí Lorena	42	36	10	12	14	34	42	-8
12	Valencianas FC	40	36	11	7	18	37	48	-11
13	FC Lorient	39	36	9	12	15	34	46	-12
14	OGC Niça	38	36	9	11	16	34	42	-8
15	SM Caen	38	36	9	11	16	37	53	-16
16	AC Ajaccio	37	36	8	13	15	37	60	-23
17	FC Sochaux-Montbéliard	36	36	9	9	18	36	59	-23
18	FC Brèst	35	36	6	17	13	39	38	1
19	Dijon FCO	35	36	9	8	19	37	57	-20
20	AJ Aussèrra	34	36	7	13	16	45	52	-7

 
 
Liga 2: Clarmont demòra a portada
 
Dirián que vòlon pas pojar, los auvernhats. O benlèu qu'o pòdon pas? Contra los Senglars de Sedan lo parat èra perfièch per passar davant Tròias (mercés a la diferéncia de gòls), e distanciar definitivament los adversaris. Mas jos un arcolin espectaclós, que semblèt envolopar un moment l'estadi Gabriel Montpied, los locals poguèron pas chepicar mai d'un còp lo portièr ardenés. Al contrari, sus una accion benastruga, los Senglars dobriguèron lo marcador, a la 86a minuta. L'afar semblava plegat mas un penalti contestat (cal dire qu'èra pas evident) permetiá als auvernhats de rampelar, dins las ultimas segondas del temps suplementari. Lo Clarmont Fotbòl se'n tira plan, demòra a portada, mas aurà d'esperar un còp del sòrt se vòlon pojar l'an que ven.
 
Istre, sens recors
 
Fòra de l’hold-up realizat a Amians a la trenta tresena jornada, dempuèi març los istrencs ganhan pas mai. Pròches un moment de las plaças del naut, se prigondisson ara, sens trapar de solucion dins lo jòc, e amb una manca de realisme evidenta. Divendres l'estadi de Fòs èra vuèg, o quasi (2046 personas dins lo public); pròva de l'escarsa qualitat de l'espectacle que prepausan los istrencs? A la primièra ocasion, Diers dubriguèt la marca per Angieus, al bèl mièg d'una defensa completament estancada. Pas jamai poguèron tornar, aprèp, malgrat unes ensages sens granda conviccion. Istre, ara assegurat del manten, daissa se debanar la fin de sason, e espèra l'estiu.
 
 
Arle-Avinhon jòga amb lo fuòc
 
En Arle, es ora que la sason s'acabe. Après los tres rampèls a casa, l'ACA se prigondiguèt a Nantas (3-0), divendres passat. A la Beaujoire, los provençals se clinèron sens poder res faire. Ara se pòdon tesicar per la fin del campionat. Aprèp un mes de març qu'aviá fach esperar una possibilitat de manten, Arle-Avinhon torna a la zòna roja, sonque tres ponches davant lo primièr relegable. Los encontres contra Mètz e Lo Mans, concurrents dirèctes, seràn decisius. Pasmens, se la qualitat de jòc monta pas, serà complicat d'esperar encara.
 
 
Mónegue balha las claus a Rems
 
Per Mónegue, los espèrs fòls de pojar s'èran estompats un chic dempuèi la desfacha a Clarmont. D'autre caire, l'Estadi de Rems podiá quasiment validar una plaça en L1 en cas de victòria. E la motivacion s'o determinèt tot: a la segonda minuta los finalistas de la Copa d'Euròpa 1956 dobriguèron la marca. Saupèron tenir malgrat los ensages timides dels vesitaires, fins a acabar definitivament los espèrs monegasques a la 71a minuta, sus un autre còp liure. Rems festeja de ser sa bona sason; Mónegue pòt pas que regretar sa maissanta primièra partida de sason.
 
 
Los resultats:
Lo Mans – Bastia 3-0; Clarmont – Sedan 1-1; Châteauroux – Tors 1-3; Nantas – Arle-Avinhon 3-0; Istre – Angieus 0-1; Boulogne – Laval 3-0; Mètz – Guingamp 2-5; Tròias – Lens 2-0 ; Rems – Mónegue 2-0.
 
 

	Esquipa	Pts	J	G	R	P	Bp	Bc	Dif
1	SC Bastia	68	36	20	8	8	59	34	25
2	Stade de Reims	61	36	17	10	9	51	36	15
3	ESTAC Tròias	58	36	15	13	8	41	35	6
4	Clarmont Fotbòl	55	36	14	13	9	45	36	9
5	Sedan	53	36	13	14	9	52	44	8
6	Tors FC	52	36	14	10	12	41	41	0
7	FC Nantas	51	36	14	9	13	49	38	11
8	EA Guingamp	49	36	13	10	13	41	42	-1
9	AS Mónegue FC	49	36	12	13	11	39	45	-6
10	FC Istre	48	36	12	12	12	45	43	2
11	Angieus SCO	48	36	12	12	12	42	41	1
12	Châteauroux	48	36	14	6	16	38	50	-12
13	Stade Lavallois	47	36	12	11	13	46	46	0
14	Lo Mans	44	36	11	11	14	37	37	0
15	RC Lens	44	36	11	11	14	40	47	-7
16	AC Arle-Avinhon	44	36	9	17	10	32	40	-8
17	Le Havre AC	41	36	9	14	13	33	34	-1
18	FC Mètz	41	36	10	11	15	29	42	-13
19	US Boulogne CO	36	36	7	15	14	38	43	-5
20	Amians SC	26	36	4	14	18	29	53	-24