Bandièra01 capçalera  1180x150: Novestivada

Actualitats

La rebellion d’un estudiant sarde a causat l’estonament dins l’estat italian

“Me volguèri exprimir en sarde perque es pas brica un dialècte”, çò diguèt Riccardo Laconi, dins sos tretze ans

Riccardo Laconi es un estudiant de tretze ans de l’escòla Alfieri de Castèl (Sardenha) qu’a causat l’estonament dins l’estat italian pel fach d’aver demandat de presentar sa memòria de gra en sarde, en luòc de l’italian. Cal dire que dins l’estat italian gaireben totes los examens se fan a l’oral.
 
Laconi respondèt en sarde, doncas, a totas las questions que li pausèron. “Me volguèri exprimir en sarde perque es pas brica un dialècte. Es una lenga, coma l’anglés o lo francés. E, en ne sabent, intram en contacte amb la cultura e la tradicion d’aquesta tèrra”, çò expliquèt.
 
E apondiá encara: “Voliái demandar amb fiertat lo drech de m’exprimir dins la miá lenga en de contèxtes oficials, coma un examen, mas m’agradariá tanben de parlar en sarde amb los mieus amics, dins las situacions quotidianas.”
 
La memòria, l’a consagrada al desvolopament sostenable e a la preservacion de l’environament en Sardenha. Una partida tractava los “ostals verds”, de bastissas amb de critèris de respècte environamental, e i parlava del prètzfach d’una cercaira sus aquel terren, Daniela Ducato; e aquela d’aquí, quand saupèt l’istòria de Riccardo Laconi, lo volguèt conéisser e felicitar. Laconi obtenguèt la nòta maximala en ponches a l’examen.
 
Lo jornal La Repubblica n’a fach un vidèo:


 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan-Ives G.
2.

Los joens acadians de Nau Brunswick en Canadà que hasón parièr dens las annadas 1960.
Qu'arrefusèn de passar los examens en anglés. Quan passèn davant lo jutge, qu'arrefusèn de respóner en anglés.
Qu'obtienón la reconeishença deu francés, e dempuish 1969 Nau Brunswick qu'ei l'unica província oficiaument bilingüe de Canadà.
Pr'aquò, de monde de noste qui volhin har parièr tà l'occitan, ja m'estoneré que'n tròbitz fòrças, joens o vielhs.

  • 4
  • 0
Max
1.

Fa gai d'o legir, benlèu balharà de bravas ideas als ados occitans ?

  • 4
  • 1

Escriu un comentari sus aqueste article