Bandièra01 1180x150: Comuna de Tolosa

Actualitats

Lo blocatge de l’avion d’Evo Morales a causat de tensions diplomaticas entre Bolívia e l’UE

L’avion de Morales s’envolèt fin finala cap a Bolívia après lo permés de passatge del govèrn espanhòl. L’avion aterrèt d’urgéncia a Viena (Àustria) perque diverses estats li enebiguèron de subrevolar los lors territòris, que sospechavan que Snowden viatjava a bòrd.


Evo Morales, president de Bolívia, s’envolèt ièr tornarmai cap al sieu país après dotze oras dins l’aeropòrt de Viena. Lo sieu avion, provenent de Moscòu, i faguèt un aterratge forçat la nuèch de dimars a dimècres perque França, Portugal, Itàlia e Espanha li neguèron lo permés de subrevolar los lors territòris, çò qu’a dobèrt un conflicte diplomatic entre Bolívia e l’Union Europèa. Aqueles païses sospechavan que dins l’avion i podiá viatjar Edward Snowden, aquel èx-tecnician de la CIA que lo govèrn estatsunidenc lo recèrca perque a publicat d’informacions secretas sus l’espionatge.
 
Morales participava a una reünion, a Moscòu, del Forum dels Païses Exportaires de Gas. En una entrevista dins Russia Today, anoncièt qu’èra dispausat a concedir l’asil a Snowden.
 
Ièr de matin, las autoritats austrianas inspectèron l’avion e confirmèron que “totes” los ocupants èran “de ciutadans bolivians”. Del sieu costat, lo Ministèri dels Afars estrangièrs espanhòl autorizèt que l’avion subrevolèsse son territòri estatal e que faguèsse escala a l’illa de la Grand Canària.
 
 
 
Indignacion e crisi diplomatica
 
En mai de Bolívia, los govèrns de l’Eqüator, Veneçuèla e Nicaragüa an exprimit lor refús de l’actitud de l’Union Europèa davant Morales, que considèran coma un mesprètz a tota l’America Latina.
                                
En Bolívia se son debanadas de manifestacions e d’acamps davant las ambaissadas e los consolats europèus. Los manifestants an cremat de drapèls de l’Union Europèa e an lançat de pèiras a l’ambaissada de França.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'avana
4.

Aquò pròba doás causas : en França tanpauc, lo Partit Socialista es pas un partit d'esquèrra e, per consequent, (estant que las gents a votat a esquèrra contra una politica de dreita), Euròpa ni mai França son pas territòris democratics. E mai se nosautres, fa ja 800 ans que ne sèm fòrt plan convençuts !

  • 6
  • 0
Robert Lauragués
3.

Mercés a aquò avèm aprés que l'Union Europèa es una colonia dels Estats Units

  • 5
  • 0
Pimflòid
2.

Ua supauicion : los govèrns de l'UE ne vòlen pas balhar l'asil a Snowden per'mor qu'an páur a Obama en purmèr.

Mes que crèi qu'an enquèra mei páur que lo Snowden se'n sòrtia plan per'mor que poderé balhar ideas a d'autes a noste tanben.

  • 4
  • 0
pèire cardenal sivergues 84400
1.

lamentabla, l'actitud de nostre president qu'autorizèt pas l'avion de moralés à survolar lo territori e que s'excusèt pueii en diguent que sabià pas que li avià lo president d'un estat independent dedins ! e puei de faire Miquèu l'ardit que mai de la vida negociarià ambe leis americans espionaires lo tractat de comerci per tombar lei bralhas dos jorns après... quora aurà fenit de jugar au paure matochin ?

  • 4
  • 1

Escriu un comentari sus aqueste article