Bandièra01 1180x150: Comuna de Tolosa

Actualitats

Los sèrbes de Kosova an creat lor assemblada pròpria en escometent Belgrad e Prishtina

Manifestacion contra l'independéncia de Kosova a Belgrad
Manifestacion contra l'independéncia de Kosova a Belgrad | Serbia SOS

Los caps del nòu parlament dison que las institucions kosovaras son illegalas, que lo nòu organisme es la melhora manièra de protegir l’estatut de Kosovo dins Serbia, e prometon un boicòt de las eleccions de novembre que ven dins la Comunautat de las Municipalitats Sèrbas. Belgrad assegura que la nòva institucion ajudarà pas los sèrbokosovars.


Divèrses caps sèrbokosovars creèron lo 4 de julhet passat l’Assemblada de Kosovo e Metohija, una estructura politica provisòria qu’es pas dins las estructuras de la Republica de Kosovo (o Kosova), nimai dins aquelas de la Republica de Serbia. Los membres del nòu parlament argumentan que las institucions kosovaras son illegalas e dison que l’acòrdi que signèron Belgrad e Prishtina en abril passat es en defòra de la Constitucion de Serbia. Segon eles, la creacion de l’Assemblada de Kosovo e Metohija es lo melhor biais de protegir los sèrbes de Kosovo e de manténer lo territòri dins l’Estat sèrbe.
 
Segon lo pacte entre Belgrad e Prishtina, los sèrbokosovars causiràn de representants de la Comunautat de las Municipalitats Sèrbas (qu’a pas res a veire amb l’Assemblada de Kosovo e Metohija) en novembre que ven. La Comunautat serà jol contraròtle de las autoritats kosovaras, mas aurà un autogovèrn parcial en matèria de desvolopament economic, educacion, santat e planificacion urbana e rurala.
 
Pr’aquò los caps de divèrsas municipalitats de majoritat sèrba del nòrd de Kosovo an promés que respectaràn pas l’acòrdi, e asseguran qu’ensajaràn de governar lo territòri a travèrs de l’Assemblada creada lo 4 de julhet passat. Lo quotidian sèrbe Politika explica que l’Assemblada es dirigida per de membres de tres partits politics desparièrs: lo Partit Socialista de Serbia, lo Partit Progressista Sèrbe e lo Partit Radical Sèrbe.
 
Los caps de la nòva Assemblada an promés tanben de boicotar las eleccions de la Comunautat de las Municipalitats en novembre que ven.
 
Mentretant, lo govèrn sèrbe es contra aquela decision. Lo primièr ministre sèrbe, Ivica Dačić, diguèt que la creacion de l’Assemblada de Kosovo e Metohija ajudariá pas los interèsses dels sèrbokosovars, segon B92. Dačić es a negociar lo camin de Serbia cap a l’Union Europèa. Las negociacions d’accès e la resolucion de l’afar de Kosova son de procèsses crosats en la relacion entre Belgrad e Brussèlas. 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article