Bandièra01 1180x150: País Invisible

Actualitats

Eslovaquia, Ongria e Polonha an suspendut las importacions de produches agricòlas d’Ucraïna

La Comission Europèa lor recòrda que lo comèrci es una politica de competéncia exclusiva europèa

Tèxte legit

Eslovaquia suspendèt diluns las importacions dels produches agricòlas d’Ucraïna. Aital jonh Ongria e Polonha, que prenguèron aquela decision dissabte davant las protèstas de lors agricultors. Bulgaria poiriá lèu tanben adoptar aquela mesura. Lo govèrn eslovac, qu’aviá ja manifestat son chepic perque los produches agricòlas ucraïneses an de prèses mens cars que los que los pòdon prepausar los agricultors eslovacs, a justificat la mesura per evitar la distorsion dels prèses dins lo mercat del país.

L’enebicion decretada per Ongria, Polonha e ara Eslovaquia a inquietat la Comission Europèa, qu'a recordat sul pic que cap dels estats de l’UE pòt pas prene de mesuras unilateralas  pertocant lo comèrci car es una politica de competéncia exclusiva europèa.

“Las accions unilateralas son pas acceptablas. En tempses tan malaisits, es crucial de coordenar e alinhar totas las decisions dintre l'UE”, çò diguèt diluns un pòrtavotz de la comission. L’organ executiu comunitari vòl pas qu'aquela posicion adoptada per Ongria, Polonha e ara Eslovaquia, tibe las relacions amb Ucraïna.

Ucraïna es lo primièr país del Mond en l’exportacion de milh, blat, virasolelh, òrdi e autras cerealas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jòrdi Caldentey Manacor (Malhòrca)
2.

Lo catalan modèrn, quand a doas opcions gramaticalas parièras de corrèctas, escuelh totjorn, totjorn, totjorn la que se sembla mai a l'espanhòl.

Pr'amor d'aquò, lo catalan modèrn a pas de sintaxi pròpria. La sintaxi del catalan modèrn gaireben es una còpia de la sintaxi castelhana-espanhòla.

A fin d'evitar que passe aquò meteis amb l'occitan, prepausi que quand i a doas opcions parièras de corrèctas, escuelhèm la que se diferéncia mai del francés e pas la que s'i sembla mai.

La 'Gramatica Occitana segon los parlars lengadocians', de Lois Alibert, admet de manièra opcional l'acòrd del participi tanben davant l'objècte dirècte ('ai saludada'/'ai saludat una femna') e pas sonque darrièr, ont es totjorn obligatòria ('la femna qu'ai saludada').

Doncas, en luòc d'"an suspendut las importacions", prepausi que digam "an suspendudas las importacions". Aquel acòrd del participi anariá en coeréncia amb la primièra frasa setmanièra de la Enigm'Òc, que ditz, fòrça encertadament, "avèm recebudes 32 responsas" e pas "avèm recebut".

  • 0
  • 0
Franc Bardòu
1.

De blat tan luènh dels païses mai cauds d'a l'entorn de la Mediterranèa non es possible que mercés a d'agro-industria a OGM e a pesticidis. Non ai res, plan segur, contra las gents d'Ucraina, brava e coratjosa, mas d'aquel fen empoisonat, n'avèm ja mai que pro a l'ostal per n'anar quérrer en mai aquí ont mai se deurà d'èsser quimic e empoisonat. Quora un morartòri ùondial contra l'us del glifosata e de totes los OGM ? Es a ne pensar que sèm totes dirigits per una maffia internacionala…

  • 6
  • 0

Escriu un comentari sus aqueste article