Lo decès del cantador corean de k-pop Moonbin la setmana passada relança lo debat sus las estrictas e mai abusivas condicions que las patisson lors idòlas. Moonbin lo trobèron mòrt dins son ostal a Seol la setmana passada; aviá 25 ans. Se privilègia l’ipotèsi d’un suicidi mas una enquista es dobèrta e s’espèra lo resultat de l’autopsia.

Moonbin comencèt sa carrièra coma idòla de k-pop amb lo grop Astro en 2016. Èra dançaire e cantador e se faguèt conéisser per de cançons coma Crazy Sexy Cool o Confession.

Aquestas darrièras annadas, se met en question las condicions de l’indústria de la k-pop après las nombrosas mòrts de joves cantadors plan famoses coma l’idòla Jonghyun, que defuntèt en 2017 a 27 ans, o l’artista Goo Hara, mòrt en 2019 a 27 ans.

L’estil musical de pòp corean, conegut internacionalament en anglés coma k-pop, s’es impausat progressivament sus l’escèna internacionala. Gràcias a sas cançons e sas coreografias dinamicas, lo fenomèn sud-corean a engatjat de comunautats de passionats dins lo Mond entièr.