Bandièra01 1180x150: Comuna de Tolosa

Actualitats

Lo ministre de l’educacion francés fòrça mal aculhit a Lion e a París

Los manifestants empachan la vesita de Pap Ndiaye a l’Inspé de Lion. De retorn a París, li còsta sortir del tren dins una caçairolada

De retorn a París, dins la gara de Lion una molonada de manifestants esperavan lo ministre en fasent sonar de caçairòlas
De retorn a París, dins la gara de Lion una molonada de manifestants esperavan lo ministre en fasent sonar de caçairòlas | @TF1Info

Tèxte legit

La vesita que lo ministre de l’educacion francés, Pap Ndiaye, deviá far diluns passat a Lion capitèt mal. Ndiaye prevesiá de se gandir a l’Institut Nacional Superior del Professorat e de l’Educacion (Inspé) al començament del tantòst mas foguèt obligat de cambiar de programa, çò rapòrta Libération. Una centena de manifestants l’esperavan davant l’establiment e ensagèron d’i intrar dedins del temps que los gendarmas los reprimissián amb de gases lacrimogèns. Lo ministre aviá anonciat sa vesita solament doas oras abans, çò que suscitèt una crida suls rets socials per anar l’aculhir.

De retorn a París, dins la gara de Lion, una molonada de manifestants esperavan lo ministre en fasent sonar de caçairòlas. Ndiaye demorèt un long moment blocat dins son tren a cai amb un dispositiu de seguretat important per téner los manifestants a distància.

Tant a París coma a Lion, los manifestants esprimissián lor malcontentament del govèrn francés per la reforma de las pensions de retirada e pel biais de l’aver impausada: “Nosautres també passarem en fòrça”, çò disián los manifestants arpitans.

De son caire, lo ministèri de l’educacion desmentís tota “anullacion” de la visita a l’establiment lionés e ditz que foguèt simplament reorganizada après la temptativa d’intrusion dels protestataris.

 

 

 

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article