Bandièra01 1180x150: Comuna de Tolosa

Actualitats

Maiòta: comença mal l’operacion per expulsar de migrants e destruire los quartièrs paures

Diluns, la polícia tirèt quitament de balas realas suls manifestants. Dimars, un tribunal enebiguèt la destruccion del quartièr Talus 2

| ecran vidèo

Tèxte legit

A mal començat a Maiòta l’operacion Wuambushu (en maorés “represa”) entamenada pel ministre francés de l’interior, Gérald Darmanin. Aquela vasta operacion militara e policièra a per tòca d’expulsar los estrangièrs en situacion irregulara, de destruire los barracaments e de luchar contra la criminalitat sus l’illa. Ièr dimars, un tribunal administratiu faguèt arrestar la destruccion del quartièr Talus 2. Pel jutge, “la destruccion de las abitacions” es “manifèstament irregulara” e “met en perilh la seguretat” dels estatjants.

Darmanin quita pas de dire que l’operacion Wuambushu a d’èsser mantenguda, malgrat la decision de la justícia, e confirma que “lo prefècte a fach un recors contra aquela decision”. Pel ministre de l’interior e de l’otramar, “l'accion menada a Maiòta es la restauracion de la patz republicana” e mai reconesca “una accion dificila mas fòrça resolguda”.

Lo preludi de l’operacion se tenguèt ja diluns jos la violéncia de l’estat. Mentre qu’un elegit del conselh departamental cridava al jornal televisat a tuar de joves comorians, la polícia reprimissiá las protèstas quitament amb de balas realas. Le Monde rapòrta que se lancèt 650 granadas lacrimogènas, 85 granadas de desencerclament e que se procediguèt a 60 tirs d’LBD e 12 de balas realas.

Diluns, las autoritats comorianas refusèron l’acostament d’un vaissèl sortit de Maiòta que transportava de migrants. “Tant que lo camp francés decidirà de far las causas de faiçon unilaterala, prendrem nòstras responsabilitats”, çò diguèt lo ministre comorian de l’interior. Mas lo prefècte de Maiòta espèra “que se reprendrà lèu” las rotacions de naviris devèrs las Comòras.

L’operacion Wuambushu a mobilizat lo dispositiu policièr màger mandat de l'Exagòn, constituït de 1800 policièrs d'unitats especialas coma lo RAID, lo GIGN e tanben los CRS8 que foguèron enviats a Roazhon fa gaire per reprimir las mobilizacions contra la reforma de las retiradas. França prevei de deslotjar de migrants illegals dels quartièrs paures e d'expulsar los comorians considerats coma “illegals” devèrs l'illa comoriana mai pròcha, Anjouan, situada a solament 70 km.

Maiòta es una illa de l’ocean Indian, administrativament francesa, que l’80% de sa populacion i vivon jol lindal de pauretat. En 2009 se votèt en referendum per estrénher los ligams amb París en tot far venir Maiòta un departament d’otramar. En octòbre de 2012 l’illa visquèt ja d’incidents violents pr’amor de las protèstas dels mai  desprovesits contra lo còst de la vida. D’aquel movement ne sortiguèt la candidatura del cap sindical Boinali Said Toumbou, qu’a las eleccions de 2012 obtenguèt un sèti a l’Assemblada Nacionala francesa. En 2016 i aguèt una cauma generala de qualques setmanas amb de “scènas de guerrilha” segon los mèdias locals. Los manifestants disián de n’aver pro d’una situacion “necoloniala” e “racista”.

Maiòta es la sola illa de l’archipèla de las Comòras qu’es demorada francesa, malgrat l’independéncia de las autras illas en 1975.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article