Bandièra01 capçalera  1180x150: Botiga

Actualitats

crotz-tolosaCreated with Sketch.GasconhaComengeVarossa

Escòla: viatge pedagogic occitan en Bearn

31 gafets qu’estúdian eth occitan en 3u en un collègi e un licèu de Sent Gaudenç que participèren a un viatge culturau e lingüistic

Escòla: viatge pedagogic occitan en Bearn
Escòla: viatge pedagogic occitan en Bearn

Deth 18 ath 20 d’abriu, 31 gafets qu’estúdian eth occitan en 3u ath collègi de Varossa e ath licèu Bagatelle de Sent Gaudenç que participèren a un viatge culturau e lingüistic en Bearn. Pendent aqueth sejorn, qu’arrencontrèren uns quantis intervenents que parlan eth occitan e que en majoritat an causit de hè’n eth sòn mestièr.

Eth dimars 18 d’abriu, eths gojats que’s triguèren en Bigòrra, ath conservatòri Henri Duparc on Émilie Manescau, professora de cant tradicionau occitan, animèc un talhèr de cant polifonic. Eths nòstis joesis gascons que trebalhèren atau a tres votzes un cant de Carnaval e un cant a dançar. Après, cap ara vila bearnesa de Nai: visita deth musèu deth berret, arrencontre damb Philippe Carrouche, gerant dera entrepresa de cauçaduras Le Soulor, visita dera bastida e iniciacion ara pelòta basca damb Philippe Biu, professor d’occitan ara Universitat de Pau e deths Païses d’Ador.

Après ua prumèra net a Isesta, eths escolans que partiren eth endeman ara descobèrta dera vath d’Aussau, en companhia de David Bordes, acompanhator en montanha e condaire. Ath programa: caminada deth costat deth Beno, seguida d’un arrencontre damb Régis Carrère, oelhèr e productor de hormatge a Laruns. Eth ser, un còp tornats ara aubèrja d’Isesta, eths joesis que participèren a ua velhada occitana, damb condes e danças, en companhia deth musician bearnés Benoît Larradet.

Enfin, eth dijaus d’abriu, eth grop que se n’anèc enà Morlaàs nà rencontrar Yves Lacoste que les ensenhèc eth quilhèr municipau e que les hec descobrir un espòrt tradicionau gascon: eras quilhas de nau. Après un passatge devant eth castèth de Pau, eths collegians e eths liceans que huren arrecebuts ath estúdio de Ràdio País, ua ràdio associativa qu’emplega siés personas e qu’emet en occitan en Bearn, en Bigòrra e en Gèrs. Eths escolans qu’arrencontrèren eth director d’antena Sylvain Carrère e eth jornalista Ludovic Jouanserre que les invitèc a participar en dirèct ara emission Lo camin deu tornar.

Pendent aqueth viatge, aqueris joesis que poderen donc escambiar en tota convivialitat damb uns quantis actors – ensenhaires, cap d’entrepresa, professionau deth torisme, agricultor, musician, arresponsable associatiu, jornalistas – que s’implican enà preservar e transméter era cultura e era lenga occitanas deth sòn parçan e que les heren partatjar era sua passion dera cultura occitana. Que cau tanben senhalar eth plan bon estat d’esperit deths escolans pendent aqueris tres dias. Que huren atentius, volentaris e arrespectuosis deras consignas. Que les cau ara realizar ua seria d’enregistraments damb comptes renduts deras visitas e impressions personalas. Solide qu’auràn de qué díguer!

 

 

 


Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…    

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article