Bandièra01 1180x150: Comuna de Tolosa

Actualitats

Rugbi de XIII: vos parlarai pas d’Anglatèrra-França…

NRL: Los Lapinons son anats batre los Cavals-Fòls a Brisbana: 32-6
NRL: Los Lapinons son anats batre los Cavals-Fòls a Brisbana: 32-6 | nrl.com

Tèxte legit

Aqueste dissabte 29 d’abril, se tenián doas oposicions entre Anglatèrra e França sus la pelena de l’estadi de Warrington.

Las doas partidas, la femenina e la masculina, se clavèron sus la meteissa marca: 64-0 en favor de la formacion britanica. Per las femnas, segur que lo campionat estequit francés permet pas de desgatjar un elèit consistent.

Pels òmes, un còp de mai, de jogaires-clau declinèron la seleccion. L’esquipa de França fa pas partida de las prioritats dels jogaires e los entraïnaires dels Dragons o del TO fan lo morre per daissar los jogaires a disposicion de Laurenç Fraissinós al bèl mitan de la sason. Plan malaisit de trabalhar dins la continuitat! Del costat anglés, s’èra fait apèl a una novèla generacion de jogaires. Lo discors de la Federacion es: “Preparam 2025 e la Copa del Mond a l’ostal.”. Demòra plan de camin de faire per èsser competitius e lo temps que demòra es plan cort. Las frasas del sit de la Federacion mancan de realisme: “Los òmes de Laurenç Fraissinós an mostrat lor melhor visatge”. Francament, que seriá estat s’èra pas estat atal?

Fin d’octòbre-debuta de novembre, del temps que los Blaus jogaràn lo campionat d’Euròpa, los angleses reçaupràn per tres tèstes los tongans, lors borrèus de la mièja finala de la Copa del Mond passada.

 

Saint Helens a Brutus

 

Aqueste divendres 5 de mai, los Dragons reçaupràn a Perpinhan lo campion Saint Helens. Los catalans demòran sus tres desfaitas consecutivas e ensajaràn d’arrestar aquela espirala negativa. Venon de faire signar un tres-quarts centre en provenença del campionat NRL ont a jogat pels Polets e per las Làmias: Matt Ikuvalu.

Dissabte, en Championship, lo Tolosa Olimpic anirà jogar cò dels Lions de Swinton.

 

Cap a la finala de Narbona

 

En Elèit 1, dissabte, Lesinhan reçaup Sent Gaudenç amb l’espèr de disputar la mièja finala a Limós lo dimenge 14 de mai.

Dimenge, Albi reçauprà Pià: lo venceire anirà desfisar Carcassona a Domèc lo dissabte 13 de mai de vèspre.

En Elèit-2, se jogaràn las mièjas finalas: Illa-l’Escura, venceire d’Entraigas 32-18 en barratge, e Vilafranca de Roergue reçauprà Vilagalhenc-Argon qu’a eliminat Baó: 46-12.

 

Torn magic a Brisbane

 

De resultats susprenents marquèron las partidas de la novena jornada del campionat NRL. Los Lapinons van batre los primadièrs, los Cavals Fòls, e plan coma cal: 32-6. De bravas victòrias de las Lamias fàcia als Vaquièrs: 44-6, e de las Anguialas fàcia als Cavalièrs: 34-12, e los Titans van batre las Aglas de Mar: 26-10. Canberra bat los Dalfins al punt en aur: 31-30. Los darrièrs se revòltan: a Penrith, los Tigres dominan las Pantèras: 12-8 e ganhan lor primièra partida de la sason, los Dògols van batre los Dragons: 18-16. Los Polets tornan victorioses de Nòva Zelanda: 14-0.

Aquesta fin de setmana, los 8 rescontres se debanan al Suncorp Stadium de Brisbane per l’edicion de 2023 del Torn Magic. Al programa:

  • divendres: Dògols-Canberra e Aglas de Mar-Cavals Fòls
  • dissabte: los neozelandeses fàcia a las Pantèras; Làmias-Dalfins; Tempèsta-Lapinons
  • dimenge: Tigres-Dragons; Polets-Vaquièrs;Titans-Anguialas.

A la fin del mes, lo 31de mai, se tendrà la primièra partida dels Estats d’Origina a Adelaïda. Las autras doas partidas auràn luòc a Brisbane lo 21de junh e a Sydney lo 12 de julh.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article