Bandièra01 1180x150: Comuna de Tolosa

Actualitats

Rugbi de XIII: los Sants aiman pas la sardana…

Artús Morgue escapa a la defensa anglesa per anar puntar lo primièr ensag catalan de la partida fàcia a Saint Helens
Artús Morgue escapa a la defensa anglesa per anar puntar lo primièr ensag catalan de la partida fàcia a Saint Helens | Dragons Catalans

Tèxte legit

Aqueste divendres de ser, los Dragons recebián pas res mens que los campions de la Superliga e tanben campions del Mond dels clubs: Saint Helens. 11 000 espectators èran venguts: un brave milierat e mièg de sostens angleses avián fait lo desplaçament.

Aprèp aver escapat a un buòu gascon a l’ora de l’entraïnament.

Aquò permetèt d’aver qualques segondas de XIII a Stade-2 (!!!) ; los Dragons dominèron las primièras vint minutas, quasiment installats dins los 20 mètres advèrses. Resulta: los angleses menavan 12-0 amb dos ensages marcats sus contrataca! Mas una corsa serpentejaira e victoriosa d’Artús Morgue, puèi lo primièr ensag per sa primièra partida jom malhòt sang e aur de Mark Ikavalu e las doas transformacions de Kreighan menavan las doas formacions a l’egalitat a la pausa: 12-12. Los catalans dominèron lo segond temps. Prenguèron l’avantatge mercé a una penalitat. Sus son ala, Tom Davies marquèt dos còps: al tèrme d’una ataca classica, puèi aprèp una passa al pè de Sam Tomkins. Puèi, la defensa locala tenguèt còp fins a la còrna. De longs aplaudiments saludèron la victòria catalana: 24-12. Los Dragons demòran plan installats a la quatrena plaça al classament.

La partida venenta a Brutus serà lo dissabte 20 de mai amb la venguda de Warrington en ueiten de la Cup. Aquesta setmana, los Dragons jogaràn divendres de ser a Castleford.

Dijòus, Hull FC aviá batut Wigan: 14-10. Divendres, Hull KR bat Huddersfield: 28-0. Leigh domina Castlefòrd 30-6. Salford va ganhar a Leeds: 22-12. Lo primièr, Warrington, s’impausa 32-18 fàcia al darrièr Wakefield qu’a totjorn pas ganhat una partida.

En Championship, lo Tolosa Olimpic se manca a Swinton, solament dotzen al classament. Malgrat la preséncia de 2 Dragons (Matieu Laguerre e Ugo Tison), los occitans pèrdon: 19-6. Novèl desplaçament per la formacion mondina aquesta fin de setmana a Batley.

 

Limós-Lesinhan e Carcassona-Albi en mièja finala

 

En partida de barratge, dissabte al Molin, los Orses tenguèron còp fins a la pausa, puèi Lesinhan s’envolèt: 46-12. Dimenge, Limós reçauprà doncas la formacion de Corbièras per la mièja finala. Los Grizzlies an ja batut los Molinièrs dos còps ongan.

Dimenge, dins la prefectura tarnesa, meteis esquèma. Aprèp un primièr temps equilibrat, los Tigres s’envolèron per se qualificar 40-6 fàcia a Pià. Dissabte de vèspre, Carcassona reçauprà los albigeses.

En Elèit 2, la finala opausarà Illa a Vilafranca. Aqueste dimenge, los catalans an eliminat l’Escura 42-22 e Vilafranca foguèt plan mai fòrt que Vilagalhenc-Argon: 26-12. La finala de Nacionala opausarà Ferrals e Palau; la de Federala se jogarà entre los Vals e Pujòls.

 

NRL: capitada populara pel Torn Magic

 

A Brisbane, de divendres a dimenge, se teniá lo Torn Magic amb las uèit partidas jogadas dins un Suncorp Stadium plen cada jornada: mai de 140 000 espectators!

Divendres, dins lor estadi, los primadièrs, los Cavals Fòls, tornavan prene la marcha endavant en batent Manly: 32-6 e Canberra capitava de faire plegar los Dògols: 34-30.

Dissabte, Penrith preniá la mesura dels neozelandeses 18-6; los Dalfins èran plan mai fòrts que las Làmias 36-1 6 e los Lapinons mestrejavan la Tempèsta 28-12.

Dimenge, cortas victòrias dels Tigres fàcia als Dragons: 18-16 e dels Titans fàcia a las Anguialas: 26-24. Los Vaquièrs domdan los Pols de Sydney: 20-6.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article