Bandièra01 1180x150: Comuna de Tolosa

Actualitats

Catalonha: un podcast sus Occitània e l’occitan, laureat del prèmi Sonòr de la melhora produccion

País Invisible sarra la realitat occitana al public catalan e es menat a bon tèrme per la còla de l’ADÒC, que tanben fa Jornalet

País Invisible es un videopodcast que cèrca de difondre Occitània al public catalan produch per l’ADÒC, que mena a bon tèrme Jornalet
País Invisible es un videopodcast que cèrca de difondre Occitània al public catalan produch per l’ADÒC, que mena a bon tèrme Jornalet | Marta Polo

Tèxte legit

Lo videopodcast País Invisible es estat guierdonat del prèmi Sonor dins la categoria de la melhora produccion. Aquel prèmi, que l’autrejan la revista La Mira e Catalonha Ràdio, es ja, dins sa segonda edicion, un dels guierdons mai importants per las produccions d’àudio en catalan. Las recompensas s’autregèron diluns passat, 15 de mai de ser, dins l’estadi del club de fotbòl de Barcelona.

País Invisible es un videopodcast que cèrca de far conéisser Occitània al public catalan. Produch per l’Associacion per la Difusion d’Occitània en Catalonha, que mena a bon tèrme Jornalet, País Invisible es dirigit e presentat per Zep Armentano amb la collaboracion de Ferriol Macip e David Valls.

Lo videopodcast prepausa un viatge sonòr de la Val d’Aran fins a las Valadas en parlant de la cultura, de la musica e de l’istòria de cada encontrada e en presentant los diferents accents de l’occitan e las tradicions de la societat occitana, de Bordèu a la Gàrdia en passant per Mónegue. Lo podcast aprofiècha totes los enregistraments faches pels autres mèdias de l’associacion, coma Jornalet o las emissions sus la cadena de television barcelonesa Betevé.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tònho P. Bossòst
3.

Per molts-ans!!!, un giuerdon plan mereishut!!!

  • 3
  • 0
P. Pojada
2.

"Zep Armentano País Invisible
1.16 de mai de 2023. 20:10h
Qu'ei un plaser d'arrecéber aguest giuerdon dempús de tant bolegar!!"

Cau díder qu'ei plan meritat.

  • 13
  • 0
Zep Armentano País Invisible
1.

Qu'ei un plaser d'arreceber aguest giuerdon dempús de tant bolegar!!

  • 17
  • 0

Escriu un comentari sus aqueste article