Bandièra01 1180x150: Comuna de Tolosa

Actualitats

Rugbi XIII: Carcassona-Limós, la finala logica

La jornada del campionat -NRL èra dedicada als pòbles aborigèns
La jornada del campionat -NRL èra dedicada als pòbles aborigèns | nrl.com

Tèxte legit

La sason d’Elèit 1 del XIII arribarà a son tèrme a Narbona aqueste dimenge 28 de mai amb la finala entre Carcassona e Limós, a 6 oras del vèspre. Es la meteissa aficha que l’an passat. Lo campion Carcassona a acabat primièr la fasa de classament e Limós èra segond. Òm se pòt esperar a un afrontament bèl.

Aquesta partida serà la darrièra de doas jornadas ont se debanaràn dètz finalas:

  • lo dissabte 27:
     
    • a 13h: finala femenina U15-U17: Lesinhan-Pià
    • a 14h30: finala femenina division nacionala: Mas d’Agenés-Clairac
    • a 16h: finala femenina Elèit 2: Pià-Aigasvivas (31)

      e a l’Arena:
       
    • a 16h: finala XIII-cadieral Elèit 2: Biganòs-Tolon
    • a 18h: finala XIII-cadieral Elèit 1: Dragons-Montalban
       
  • lo dimenge 28:
     
    • a 10h, finala U15: Albi-Carcassona
    • a 11h30: finala U17: Geckos catalans-XIII Catalan
    • a 13h15: finala U19: St Estève-XIII Catalan / Vilanòva
    • a 15h30: finala femenina Elèit 1: l’Escura-Divessas Catalanas
    • a 18h: finala Elèit 1: Carcassona-Limós

 

Los campions del dimenge 21

 

Tre aqueste dimenge 21, se tenián qualques finalas.

A Pià, Palau batiá Ferrals en campionat de Nacionala 23-20 e pensa fòrtament a la montada en Elèit 2. En Federala, victòria dels vals (Val d’Orbiu e Val de Danha) qu’acaban la sason sens una sola desfaita: victòria fàcia a Pujòls: 27-14.

A Pàmias, los juniors de Tolosa empòrtan la Copa Nitard mercé a la victòria 24-14 fàcia a Carcassona. Lo bloquièr d’Elèit 2 ven a Illa que pren lo pas sus Vilafranca de Roergue dins las darrièras minutas: victòria 25-18.

 

Los Dragons aniràn pas a Wembley

 

La participacion dels catalans a la Cup aurà durat lo temps d’una partida. A Brutus, un ensag a la 78a minuta de Warrington manda los Lops en quart de finala: 14-12.

Se son tanben qualificats pels quarts que se jogaràn la dimenjada del 17 de junh: Leigh (victòria a Wakefield: 40-12); Hull FC (victòria a Castleford: 32-8); Saint Helens (victòria a Halifax: 26-6); Wigan (victòria a Leeds: 18-14); Hull KR passa 50 punts a Batley (50-0); Salford capita de batre Huddersfield: 42-20. York empòrta l’afrontament de las formacions de Championship fàcia a Londres: 36-12.

En quart de finala, aurem las oposicions: Hull KR/Salford; York/Leigh; Hull FC/Saint Helens; e en cap d’aficha: Wigan-Warrington.

Divendres, pel compte de la Superliga, losDragons reçaupràn los darrièrs de la classa: Wakefield, qu’an totjorn pas ganhat una partida.

 

NRL: regropament en cap de competicion

 

En Austràlia, èra la jornada de campionat dedicada als pòbles aborigèns. Alara que lo primièr State of Origine s’acèrca (dimècres 31 de mai, a Adelaïda), lo campionat de NRL coneis un regropament en cap de competicion amb 5 esquipas a 16 punts seguidas per 3 a 14 punts.

Quatre esquipas an ganhat al defòra: Penrith cò dels Cavals Fòls: 15-4; las Anguialas cò dels Lapinons 36-16; Melbourne cò dels Dalfins: 24-16; Manly a Canberra: 42-14.

La partida se jòga dins las darrièras segondas pels Dragons que baton los Polets: 24-22; los Dògols baton los Titans: 20-18. Las Làmias dominan Newcastle: 26-6. Lo carton del jorn es pels Tigres que se fan las urpas suls Vaquièrs: 66-18!

 

Pas de Copa del Mond en França en 2025

 

L’informacion es venguda oficiala diluns 15 de mai passat: França organizarà pas las Copas del Mond del XIII de 2025. Las previsions financièras èran pas de las bonas.

Es un problèma bèl pel president Lacòsta qu’aviá fait de l’organizacion de las competicions lo punt fòrt de son mandat. Parla de remetre en jòc son pòst en organizant una consulta.

Lo mai versemblable es que la competicion se debanarà dins l’emisfèri sud: Austràlia probable amb lo possible concors de la Nòva-Zelanda e d’illas del Pacific. Mai estonant: Qatar se seriá mostrat interessat?!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article