Bandièra01 1180x150: País Invisible

Actualitats

La supression dels vòls interiors càmbia pas grand causa

Dempuèi dimars passat an cessat los vòls interiors dins l’estat francés qu’avián una alternativa en tren de mens de 2h30

Tèxte legit

Dempuèi dimars passat i a pas pus de vòls d’avion interiors dins l’estat francés qu’avián una alternativa en tren de mens de 2h30. Pasmens, sembla que l’aplicacion d’aquela mesura càmbia pas grand causa. Segon l'Union dels Aeropòrts Franceses (UAF) la mesura considèra un grand nombre d’excepcions e la majoritat d’aqueles vòls de suprimir o èran ja. Las tres solas linhas dirèctament afectadas per aquesta mesura, que jonhián Paris-Orly amb Bordèu, Lion e Nantas, avián ja cessat amb la crisi de la covid e son pas jamai estats restablits. De remarcar que la linha París-Bordèu transportèt 566 000 passatgièrs en 2019, son darrièr an de foncionament.

D’un caire, lo decret establís que los trajèctes ferrioviaris se devon  comptar segon la gara que desservís l’aeropòrt pertocat; doncas per l’aeropòrt de París Roissy se compta sa gara TGV que sos trajèctes devèrs Bordèu e Nantas supèran las 2h30. Per tant, los vòls pòdon pas partir de París-Orly mas si de París-Roissy. D’autre caire, la mesura concernís pas los vòls en correspondéncia.

Cossí que siá, las associacions de consumaires an reclamat al govèrn francés que garentisca que l’SNCF aprofièche pas la situacion per conflar los prèses ni degradar la qualitat del servici.

La mesura s’aprovèt en 2021 per combatre l’escalfament global, mas caliá l’autorizacion de la Comission Europèa après lo recors depausat per l’Union dels Aeropòrts Franceses e la branca europèa del Conselh Internacional dels Aeropòrts. En decembre, lo Conselh d’Estat validèt la mesura que s’aplicarà per un periòde de tres ans; puèi la caldrà revisar.

Lo president francés, Emmanuel Macron, s'es mostrat fier de la mesura dins una fiulada publicada sus Twitter, mai que mai que França siá lo primièr país a aplicar una mesura d'aquela sòrta.

 

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article