Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasMontpelhierenc

Arts, desvolopament duradís, musica e ajustas: una setmana de las ricas pels collegians setòris

La setmana passada, las 6as dau collègi Victor Hugo de Seta participèron a plusors activitats a l’entorn de las arts e dau mitan maritim

Arts, desvolopament duradís, musica e ajustas una setmana de las ricas pels collegians setòris
Arts, desvolopament duradís, musica e ajustas una setmana de las ricas pels collegians setòris

Occi’K-Live: d’street art en occitan sus la preservacion de las mars

 

Aprèp aver estudiat en classa los enjòcs de la preservacion de las mars e das litoraus, los collegians escriguèron,`en classa, d’eslogans sus la preservacion d’aqueles mitans per ne far d’estampons. Coma, per exemple, “La mar es la sang de la planeta, la cau gardar sana e neta” o ben “la mar es una meravilha, i cau pas escampar sas escobilhas”.

Lo dimars 30 de mai, anèron vesitar lo musèu A Cèl Dobèrt (MACO) de l’Iscla de Taur, ont aprenguèron que los noms das immòbles d’aquel quartièr popular èran totes de noms de fialat de pesca e qu’aqueles noms venián totes de l’occitan, coma lo “Veradièr” que servís per pescar de veirats, lo sardinal, l’acelièra, etc.

Se seguiguèt un rescontre amb los artistas dau festenau K-Live que s’acabèt amb un talhièr ont los joves setòris poguèron amb l’ajuda das artistas descobrir lo biais de se servir d’una bomba de pintura per realizar una polida òbra d’art.

 

Jornada d’escambis amb los collegians de Roergue

 

Lo dijòus primièr de junh, los joves setòris recebèron la vesita das collegians de Requistar e de Valença d’Albigés per descobrir la musica tradicionala d’Occitània e un de sos jòcs mai emblematics: las ajustas lengadocianas.

Mercés au Ceucle Occitan Setòri, los collegians assistiguèron a una conferéncia-concèrt de Felip Carcassés dins la sala polivalenta dau collègi Victor Hugo. Lo famós autboissaire de las ajustas e grand traductor de Brassens lor presentèt lo frestèl, la cabreta, l’autbòi, etc. Aquel moment s’acabèt en cant collectiu ont avaironeses e setòris cantèron en còr l’imne de Seta, La Fèsta de l’Issanca.

Lo tantòst, collegians e collegianas s’inicièron a las ajustas lengadocianas jos la supervision dels sòcis de la societat d’ajustas la Lança Amicala Setòria e la jornada s’acabèt per un gostar ofèrt pel Ceucle Occitan Setòri.

 

 

 


Jornalet a l'escòla

 

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article