Bandièra01 1180x150: Comuna de Tolosa

Actualitats

crotz-tolosaCreated with Sketch.LemosinLemosinPaís d'Usercha

An arrestat en Lemosin un neonazi norvegian suspècte de preparar un acte terrorista

Lo Ministèri de l’Interior de França raportèt ièr dimars que Kristian Vikernes, un òme de 40 ans “pròche del movement neonazi”, foguèt detengut per èsser “suspècte de preparar un acte terrorista d’envergadura”.
 
Vikernes èra “una menaça potenciala per la societat, coma o testifica la violéncia de sas declaracions interceptadas” sus Internet, çò afirmèt lo ministèri.
 
Kristian Vikernes es un musician de black metal: es fòrça conegut dins aquel mitan sota los escaisses de Burzum e Varg Vikernes. Foguèt arrestat e detengut amb sa femna, Marie Cachet, de 25 ans. Foguèron preses dins lor ostal a Celom (País d’Usercha), ont demòran amb lors tres enfants.
 
Vikernes èra ja estat condemnat en Norvègia a 21 ans de preson per l’assassinat d’un de sos amics e sortiguèt de la càrcer après complir 16 ans de pena. Tre alavetz, en 2010, s’installèt en Lemosin.
 
Lo norvegian èra susvelhat per la polícia francesa dempuèi fòrça temps, mas òm decidiguèt de l’arrestar quand la siá femna comencèt d’aquerir d’armas. Dins son ostal la polícia i a trobat cinc rifles.
 
Vikernes publicava sul ret de messatges racistas e antisemitas. Sus aqueste blòg parla de sa residéncia novèla en Lemosin, amb de deliris d’extrèma drecha. L’ultradrechan foguèt un dels destinataris del manifèst que l’extremista norvegian Anders Behring Breivik difondèt abans de cometre los atemptats sagnoses d’Òslo e Utøya en 2011.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid (antifachista E fan de Burzum)
5.

Que's deveré concentrar sus la musica au lòc de peguejar sus internet. Racistas qui's vantan de votar FN e d'aver fesilhs a l'ostau que n'avem pro ací! LOL!

  • 0
  • 1
Antifaissista
4.

#3 I d'explicas dins aqueste article de Libération, qu'es fòrça melhor que d'autres articles superficials de la premsa franchimanda:

http://www.liberation.fr/societe/2013/07/16/le-norvegien-varg-chanteur-neonazi-donne-la-fievre-a-la-police_918812

  • 3
  • 0
Inocent Trets
3.

E de que veniá cercar e far en Occitània aquel ?

  • 3
  • 0
Antifaissista
2.

#1 Breivik mandèt son manifèst a Vikernes. Mas Vikernes es pròche del neonazisme e del neopaganisme. Vikernes asira Breivik perque Breivik se pretend crestian e sionista.

O dises ben: i a pas de logica dins l'extrèma drecha.

  • 6
  • 0
Batko
1.

Ei estranh, lo Breivik ei un sionista convençut, lo Vikernes un antisemita, e doncas son de la medisha dralha ? Bon, sabi que dreta estrema e logica be son duas causas desparièras.

  • 8
  • 0

Escriu un comentari sus aqueste article