Bandièra01 1180x150: País Invisible

Actualitats

Lo Ministèri francés de l’Educacion voldriá aflaquir l’occitan al licèu

Segon una informacion difusada dintre l’administracion rectorala de Montpelhièr, vòl barrar las formacions de 2a, 1a e terminala “bilingua regionala” a la rintrada de 2023

Lo Ministèri francés de l’Educacion voldriá aflaquir encara mai l’occitan al licèu
Lo Ministèri francés de l’Educacion voldriá aflaquir encara mai l’occitan al licèu

Tèxte legit

Lo Ministèri francés de l’Educacion voldriá suprimir las seccions bilinguas de lengas dichas regionalas al licèu. S’aquò se confirmava, seriá catastrofic per l’ensenhament de l’occitan e de las autras lengas minorizadas de l’estat, dins lo segond cicle de l’educacion segondària.

Segon una informacion difusada dintre l’administracion rectorala de Montpelhièr en direccion dels licèus, lo Ministèri francés de l’Educacion informa de la “barradura de las formacions de segonda, primièra e terminala bilingua regionala a la rintrada de 2023”, çò an senhalat d’ensenhaires catalans a la Federacion per las Lengas Regionalas dins l’Ensenhament Public (FLAREP).

Sèm a l’espèra d’aver mai d’informacions d’aquesta passa, e de la reaccion de la Federacion dels Ensenhaires de Lenga e Cultura d’Òc (FÈLCO), que s’associariá a un corrièr de la FLAREP al ministre de l’educacion per li demandar qu’aquela error siá corregida e que se respècte la lei de proteccion e promocion de las lengas minorizadas, aviada pel deputat breton Paul Molac en 2021, mas sens efièch concret dempuèi alavetz.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan Carcassona
5.

Mas quant de cursus bilingue occitan al licèu ? Levat lo magrinèl e volontarista licèu Calandreta a Montpelhièr...

  • 13
  • 0
Emanuèla
4.

Que n'ai un sadol de l'actitud de Paris / de la França. Soi tan alassada d'aquesta crotzada perpetuala contra la lenga nòstra. Aquest païs tan arrogant es pas mai per ièu qu'una bèla decebuda.

  • 22
  • 1
Guilhèm Thomas Tolosa
3.

Lol, la FELCO, la FLAREP ?

Existisson encara aquelas mèrdas ?

Van "Mandar un corrièr" ? lol. Farián melhor de mandar directament de fuèlhs de papièr igienic al ministèri.

  • 18
  • 8
Franc Bardòu
2.

Lo Ministèri francés de l’Educacion voldriá aflaquir l’occitan al licèu ? Voldètz rire, amb aquela formula a delà de l'eufemistic ? Los Ministèris franceses vòlon suprimir l'occitan, al collègi, al licèu, ont que siá dins la vida publica. Las autoritats francesas nos vòlon muts, mòrts e complètament oblidats. "A lor fruita, los coneisseretz"…

  • 25
  • 3
Pau Casal
1.

Le Ministèri francés de l’Educacion voldriá aflaquir l’occitan al licèu? E mès demorès pas grand causa d'aquel ensenhament, i auriá encara qualquarrés a aflaquir?
"Nos laissarem pas tòrcer", ça disián les carbonièrs de la Sala? e ben, non, nos deisham pas tòrcer mas tanplan nos tòrcen. Dincas ont gausaràs anar per nos fèr crebar? Dincas ont anirem per resistir?

  • 28
  • 4

Escriu un comentari sus aqueste article