Actualitats
Brussèlas: gròssa protèsta dels professionals de la santat
Los sindicats denóncian las condicions de trabalh dels infirmièrs, ajudas sonhants, ajudas a domicili o del personal de las grépias o de las institucions d’ajuda als joves
Tèxte legit
De salariats dels servicis socials e de la santat manifestèron dimars per las carrièras de Brussèlas per fin d’exigir de melhoras condicions de trabalh. De milièrs de personas (7000 segon la polícia e 12 000 segon los organizaires) seguiguèron la crida dels sindicats dins una marcha que percorreguèt environ tres quilomètres.
Los sindicats, amassats en front comun estatal, denoncièron las condicions de trabalh dels infirmièrs, ajudas sonhants, ajudas a domicili, del personal de las grépias o de las institucions d'ajuda als joves. Reclamèron tanben la solidaritat dels mètges. Exigisson del govèrn d’aumentar las ressorsas pels servicis publics e sanitaris, non solament de far pojar los salaris mas tanben de melhorar las condicions de trabalh, çò rapòrta l’RTBF.
Ara per ara, de doas infirmièras una declara voler quitar la profession, çò rapòrta tanben l’RTBF.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Ara per ara, de dos infirmièrs, òmes o femnas, un declara voler quitar la profession, çò rapòrta tanben l’RTBF. Plan segur. Son tractats coma de professors en França. Meteissa causa, meteis efècte.
Los vièlhs non trebalhan mai donc, non rapòrtan pas mai : desplumam-los de lors darrièrs centimes en EHPAD puèi daissam-los crebar.
Los malauts non van al trebalh e donc non produson mai, donc non rapòrtan res mai a lor espleitaires. Plumam-los en operacions e medicacions onerosas (tant coma se pòsca non remborsadas, que se demèrden !) puèi daissam los crebar o subreviure coma o poiràn, amb lo mens d'ajuda e de sosten possible, fins que tornen raportat a l'espleitaire.
Los enfants non produson pas res dins cap de cadena de produccion ; non rapòrtan pas encara : plumam lors parents en còst eventual d'escolaritat (çò privat deguent venir la règla) puèi daissam-los anar a la decisa. Los qu'auràn pro pagat se'n tiraràn benlèu, los autres, se non rapòrtan pro, que s'anen far tondre.
L'ideal, de tot biais, es un pòble "competent tecnicament", e "con coma de malas sense manilhas" per tota question culturala, sociala, societala, politica, sense dreit socials, amb un curvèl d'obligacions e d'assignacions a l'eficiéncia professionala que lor assegure una vida de mèrda plan productiva fins que sián tròp vielhasses per raportar, e que, malautejant, s'anen far plumar abans de crebar !
En brac, visca lo mond neoliberal a l'americana ! Volgut o non volgut, aqueste fotut mond, adven de tot biais : aquò se ditz "mondializacion".
Per mai de precisions (sus la finalitat e l'ideal societal e social del "neoliberalisme" impausat pertot amb de mai en mai d'autoritarsime — "neoliberalisme" valent a dire del "capitalisme en ròdas liuras", sense cap mai mond pretendut comunista, nas e nas), vos recomandi tot particularament la lectura de l'enquista sociologica del grand autor Jack London "Le peuple d'en bas", indisponibla en occitan, mas totun accessibla en francés, a las edicions Libretto (2018) dins la version actuala en format de pòcha. La version originala "The People Of The Abyss" es en anglés dels Estats Units d'America, la quita lenga maire del meravelhós neoliberalisme.
Lèu, al fronton dels monuments oficials, i trobaretz l'inscripcion oficiala "Rapporte, coûte le moins possible, ou bien dégage, vite et loin". En lenga oficiala, plan segur ! Non pas dins qualque lenga de sedicion terrorista d'ultra-gaucha que, las escotèssetz, tornariatz lèu fait a la França de De Gaule, un vertadièr nisal de sèrps sovieticas…
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari