La comission europèa per la democracia e pel drech, dicha Comission de Venècia, considerèt dimècres passat que l’emplec que lo fa lo govèrn francés de l’article 49.3 “lèva d’interrogacions en comparason dels principis del pluralisme, de la separacion de poders e de la sobeiranetat del legislator”, çò rapòrta Libération. L’actual govèrn d’Élisabeth Borne a emplegat onze còps aquela pòrta petita dempuèi lo mes de mai passat, per far aprovar de mesuras dont la polemica reforma de las retiradas.

Segon la Comission de Venècia, lo govèrn que se servís d’un article coma lo 49.3 se deu sometre a una mocion de censura que requerís una majoritat absoluda per ben capitar. Abans son rapòrt definitiu, la Comission realizarà una analisi comparativa de las diferentas constitucions e legislacions dels estats del Conselh d’Euròpa per tal d’establir fins a quin ponch los executius an drech d’intervenir dins los poders legislatius parlamentaris.  

La Comission de Venècia es un conselh consultatiu del Conselh d'Euròpa que pòrta als estats de vejaires juridics sus de projèctes de lei o de tèxtes ja votats.