Lo 13 de junh passat, pareguèt per PC, Nintendo Switch, Playstation e Xbox lo videojòc Dordogne (Dordonha), que son accion se situa en Peiregòrd. L’interfàcia e los dialògs en occitan los a traduches Danís Chapduelh, e la còla de doblatge l’a dirigida Laurent Labadie. A mai, Chapduelh convida a descobrir ensems lo jòc en streaming. Ne parla amb los confraires de Ràdio Occitània.

Es un moment que los gamers d’Occitània esperavan dempuèi un brieu! La version occitana del videojòc Dordonha es enfin disponibla sus totes los supòrts. Per o festejar dignament, l’autor de sa version occitana, a saber lo peiregòrd Danís Chapduelh, organiza un live Twitch per far un provament en dirècte lo 13 de junh. Sèm tornats amb el sus aquela experiéncia e sus aquela oportunitat de testar lo jòc amb sa comunautat.