Bandièra01 1180x150: País Invisible

Actualitats

Indignacion pel retard del tunèl de Tenda

Lo trauc que deviá jónher las vals Ròia e Vermenhana serà pas alestit abans la prima venenta

| www.tunneltenda.it

Tèxte legit

Indignacion dins las vals Ròia e Vermenhana pel retard del segond tunèl que deviá melhorar la connexion de las doas vals. Èra anonciat per octòbre que ven, per manca solament dels darrièrs 300 mètres del costat de Ròia. Ara n’anóncian l’obertura per mai de 2024. D’elegits municipals e mai de revistas localas manifèstan lor desespèr en tot assegurar que “lo tunèl es vital pel territòri”, çò rapòrta lo quotidian Targatocn.itque qualifica lo retard de “docha freja”. Dins lo budget general de l'òbra, semblariá resolguda la question contractuala entre Anas e Edilmaco, encargats de l'execucion dels trabalhs, mas —totjorn segon Targatocn.it— se crenh un grèuge de despensas.

Lo primièr tunèl de Tenda s’inaugurèt en 1882. Lo flux de transit de mai en mai creissent a requerit un trabalh de modernizacion amb la bastison d’aqueste segond tunèl, dich Tenda bis, e las òbras comencèron en 2012. Los retards interminables son estat provocats per d’enquistas del procuraire de Cuni per presumida frauda e panatòri.

 

Una region autonòma transfrontalièra

 

De son latz, l’Assemblada Occitana Occitana de las Valadas assegura que lo fach que “non se pòsca pas transitar dins tot l’ivèrn de 2023-2024 portarà d’inevitables damatges economics a las Valadas Occitanas”. En consequéncia, reclama que, coma mesuras compensativas, s’aumente lo servici ferroviari, se torne eficient e se n’incite l’usatge en tot reduire las tarifas. A mai, l’Assemblada revendica que las decisions se prengan sul territòri e non pas endacòm mai, e prepausa la creacion d’una region autonòma transestatala qu’aja de competéncias dins los camps de la santat, dels transpòrts, de l’educacion e de la viabilitat de l’arquitectura e del torisme.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article