Los Dragons recebián a Brutus aqueste dissabte 24 de junh, jorn de Sant-Joan, una brava fèsta populara catalana. Atal, lo rescontre èra nomenat “laPartida de la Catalanitat” amb lo sosten de la Plataforma per la llengua. S’anóncia la traduccion del sit del club en catalan, un sosten a las retrasmissions sus Ràdio Arrels, de messatges en catalan dels jogaires suls rets socials.

Aqueste dissabte, los Castellers del Riberal faguèron una demostracion sus la pelena. Los Gigants, los CapsGrossos e lo Drac de Foc faguèron lo torn del terren. La Colla de Tuïr, la Colla Gegantera del Soler, la Colla Sardanista e lo grop Els Claranencs èran presents. L’imne Els Segadors foguèt interpretat per Fred Jonca (coma de costuma ara qu’es lo remplaçant d’Albert Bueno ) acompahat per Ramon Gual e la corala dels mainatges de las escòlas St Josèp e Maintenon.

“QuandòmseditzDragonsCatalans, es logic de revendicarl’usatgedelcatalan”, çò estima la Plataforma.

Una partida fòla

Los Dragons, primadièrs, recebián los tresens, los Leopards de Leigh. Los catalans ataquèron fòrt la partida: ensag d’Artur Morgue tre la primièra minuta, un segond a la cinquena, e al quart d’ora menèron 20-0. Los angleses signavan tres ensages per tornar a 20-12 a la pausa. A l’ora de jòc, los vesitaires prenguèron l’avantatge 30-26, mas los Sang e Aur finiguèron que s’impausèron: 38-30 . Marcan 6 ensages, mas n’encaissan 5. Lo capitani Garcia e l’alièr Johnstone ne marcan 2 cadun: l’alièr n’es al vinten dins la sason!

Los catalans fan lo trauc en cap de classament, vist que lo segond Warrington es estat batut per Castleford: 14-23. St Helens plega fàcia a Hull FC: 6-34.

Dissabte 1r de vèspre, los Dragons jogaràn justament cò d’Hull FC. Leeds passa un 54-0 a Huddersfield. Wakefield pèrd cò d’Hull KR: 12-28.

Tolosa se ten fièr

En Championship, Tolosa ganha una quatrena partida en seguida e fa pas las causas a mièjas en dominant Bradford 52-14. Dissabte, lo TO reçauprà los Viquings de Widnes amb l’intencion de persègre la tièra de victòrias.

Queensland, mèstre d’Austràlia

Aqueste dimècres, a Brisbane, Queensland recebiá la segonda partida de l’State of Origine. A l’ostal, los Bordèu (Maroons) se mostrèron intractables e subrepassèron los Blaus: 32-6, emportant atal la tièra dels rescontres de 2023. Demorarà als Blaus d’ensajar de salvar l’onor a Sydney lo 13 de julh.

L’endeman, a Townsville, se teniá la segonda partida femenina. Las Blavas marcavan dins las darrièras minutas per ganhar: 18-14; Victòria insufisenta que balha lo trofèu de l’an a las jogairas de Queensland qu’avián ganhada la primièra partida 18-10.

En campionat NRL, los neozelandeses van batre los Dragons 48-18; las Anguialas ganhan cò dels Dalfins: 48-20; las Pantèras sèrvan la primièra plaça en batent Newcastle 20-12; Melbourne bat Manly 24-6; los Vaquièrs passan un 31-6 als Lapinons; los Titans susprenon los Cavals Fòls 18-12 e Canberra se va impausar cò dels Polets 20-18.