Bandièra01 1180x150: País Invisible

Actualitats

Son condemnats los 55 dalhaires de Roergue

Son acusats d’aver esventrat de sacas de cerealas OGM dins un entrepaus roergàs

| @totem_radio

Tèxte legit

La justícia a emés son vejaire sul cas dels 55 dalhaires volontaris qu’en novembre de 2021 esventrèron de sacas de “semens OGM” dins un entrepaus roergat. Los an condemnats totes a de multas de 200 èuros sens ajornaments e tanben a pagar al cerealièr roergàs 6566 èuros  per damatges, 1000 èuros per prejudici moral e enfin 1500 pels còstes dels avocats. Almens los an relaxats de las acusacions de panatòri, çò rapòrta Reporterre.

A la debuta del procès èran perseguits 28 dalhaires pel tribunal correccional de Rodés. Mas al començament de junh, una vintena de simpatizants se presentèt espontanèament en demandant a èsser jutjats al meteis títol que los autres.

La dalhaira volontària Christine Thelen se declarèt “mitigada” als jornalistas de France 3: “Aquel jorn, faguèrem un acte de desobesissença civila e un acte ciutadan. Èrem venguts far una inspeccion ciutadana per denonciar lo fach que la RAGT contunha de cultivar de plantas modificadas geneticament que resistisson als erbicidas. Volèm pas pus de pesticidas. La gent n’es malauta. Los enfants son malauts. La natura es malauta. La jutgessa a pas entendut aquel argument. Soi decebuda qu'aja pas agut lo coratge de protegir la societat. Es pasmens lo ròtle de la justícia”.

De soslinhar que demest los acusats i aviá lo jornalista Grégoire Souchay qu’es estat relaxat. Lo jorn dels faches se trobava aquí per reportar l’eveniment per Reporterre, Libération e L’Éveil de Lozère.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jordi Caldentey Manacor (Malhòrca)
1.

Jol títol de l'informacion, avètz escrich 'd’aver' dos còps per errança.

Lo catalan modèrn, quand a doas opcions gramaticalas parièras de corrèctas, escuelh totjorn la que se sembla mai a l'espanhòl. Pr'amor d'aquò, lo catalan modèrn a pas de sintaxi pròpria.

A fin d'evitar que passe aquò meteis amb l'occitan, prepausi que, quand i a doas opcions parièras de corrèctas, escuelhèm la que se diferéncia mai del francés e pas la que s'i sembla mai.

Pr'amor de que Lois Alibert admet dins sa Gramatica Occitana coma corrècte que i aja acòrdi (e tanben que no n'hi aja pas) entre lo genre e lo nombre del participi passat amb l'objècte dirècte, doncas, en luòc de " Son acusats d’aver esventrat de sacas de cerealas”, prepausi que digam " Son acusats d’aver ESVENTRADAS de sacas de cerealas".

  • 2
  • 3

Escriu un comentari sus aqueste article