Actualitats
Murtre de Nahel: la guèrra de las canhòtas e la crida a la patz
La canhòta de sosten al policièr que tuèt lo jove Nahel despassa lo milion d’èuros
Tèxte legit
La canhòta en sosten al policièr que tuèt lo 27 de junh passat l’adolescent de 17 ans Nahel M. a reculhit mai d’un milion tres cents mila èuros d’aperaquí 46 000 donaires. D’autre caire, la canhòta de sosten a la familha de Nahel a atench environ 230 000 èuros.
La canhòta de sosten al policièr murtrièr es una iniciativa del naut foncionari e polemista d’extrèma drecha Jean Messiha, pròche d’Éric Zemmour, qu’assegura que lo policièr “faguèt son trabalh e ara ne paga un naut prètz”. La plataforma que l’albèrga l’a jutjada legala. La primièra ministra, Élizabeth Borne, assegura qu’aquela inciativa “contributz pas a l’amaisament”. Mas dins lo fons sembla qu’aquò es precisament la tòca de l’iniciativa. Per aquela rason, delà las felicitacions e las criticas de l’inciativa, i a de mobilizacions qu’explican cossí senhalar la canhòta amb d’arguments juridics:
D’autre caire, la canhòta iniciada sus la plataforma Leetchi.com de sosten a la maire de Nahel despassa los 325 000 èuros de près de 17 000 participants.
“Arrestatz, son las maires que prenon los buses”
E mentre que França arriba a las 3200 personas arrestadas, al nivèl de las protèstas de 2005, la grandmaire de Nahel a facha una crida a metre lo ponch final a las susmautas e a se servir pas pus del murtre de Nahel.
“Volèm qu’aqueles joves demòren tranquils. Nahel es mòrt. Ma filha aviá un sol enfant, es perduda, es finida, ma filha a pas pus de vida. E a ieu, m'an fach pèrdre ma filha e mon felen”, çò diguèt “fatigada”. E diguèt pro: “Al mond que son a esclapar las causas, lor disi qu’arrèsten. Qu’esclapen pas las veirinas, qu’esclapen pas las escòlas, pas quitament los buses. Arrestatz, son las maires que prenon los buses, son las maires que van defòra”, çò diguèt.
En mai d’aquò, tanben diguèt que sabiá mal als dos policièrs “perque èran dos los que balhèron dos còps de cròça al cap de mon felen, e lo que li tirèt dirèctament dins lo còr auriá pogut tirar dind la camba o dins lo braç”, çò declarèt a prepaus de la canhòta de Jean Messiha.
La cagnotte en faveur du policier qui a tué #Nahel est une ignominie de Jean Messiha, pitre d'#extremedroite (qui m'avait un temps attaqué en justice avant de renoncer, de peur d'une cuisante défaite judiciaire). @gofundme doit mettre un terme à cette cagnotte. #GofundmeComplicepic.twitter.com/5GC5Ic7s74
— Dominique Sopo (@d_sopo) July 2, 2023
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari