Bandièra01 1180x150: País Invisible

Actualitats

crotz-tolosaCreated with Sketch.LengadòcLengadòc BasBesierés

Besièrs: Ménard a refusat de celebrar un maridatge autorizat pel procuraire

Lo cònsol màger s’es opausat a l’union d’un òme de 23 ans e d’una femna de 29 perque l’òme es argerian e se tròba en situacion irregulara

Besièrs: Ménard a refusat de celebrar un maridatge autorizat pel procuraire
Besièrs: Ménard a refusat de celebrar un maridatge autorizat pel procuraire

Tèxte legit

Lo cònsol màger de Besièrs, Robert Ménard, refusèt divendres de celebrar un maridatge d’un òme de 23 ans e d’una femna de 29. L’òme es argerian, se tròba en situacion irregulara e Ménard pretextèt la sospiècha d’un maridatge dich “blanc” o de “convenença”. Ça que la, lo procuraire aviá autorizada aquela union e aviá avertit la comuna que se deviá respectar aquel “drech fondamental”, çò rapòrta Le Monde. De son caire, Ménard declarèt a l’Agéncia France Presse: “Lo maridatge a pas agut luòc, m’i soi opausat”.

Lo parelh s’èran presentats en fin de matin a l’ostal de la comuna de Besièrs, coma èra previst, e après una orada d’espèra, foguèron assabentats de la decision del cònsol màger. Per tant, anèron sul pic al comissariat per far lor denóncia contra Ménard.

Lo procuraire de la Republica de Besièrs, Raphaël Balland, aviá informada la comuna, lo 16 de junh passat, qu’aviá decidit “d’ajornar pas lo maridatge”, estimant que i aviá “pas pro d’indicis serioses que permetèsson de presumir l’abséncia de consentiment matrimonial”. Encara dijòus, un jorn abans la ceremònia non celebrada, Balland aviá precisat l’acòrdi del ministèri public a aquela union après aver examinat las audicions separadas dels dos esposes realizadas per l'oficièr d'estat civil de la municipalitat, e i aver pas decelada d'incoeréncia.

L’òme que se deviá maridar aviá recebut un òrdre d’obligacion de quitar lo territòri (OQTF), mas ça que la Balland aviá ramentat a la comuna que “lo maridatge es un drech fondamental”.

Es pas lo primièr còp que Ménard protagoniza un episòdi de racisme e xenofobia.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article