Bandièra01 capçalera  1180x150: Novestivada

Actualitats

Rugbi de XIII: los Gigants son pas aimables…

Lo Mas d’Agenés XIII se muda a Faugueròlas
Lo Mas d’Agenés XIII se muda a Faugueròlas | Le Mas XIII

Tèxte legit

Dissabte passat, los catalans manquèron l’oportunitat de s’escapar en cap de classament.

Divendres, se Leigh confirmava sa dinamica en ganhant a Castleford (34-16), avián vist Warrington pèrdre sus sa pelena fàcia a Saint Helens (20-24) e Wigan batut a Wakefield qu’ensaja de se salvar la pèl (27-26).

Dissabte, los Dragons recebián los Gigants d’Huddersfield, en desena posicion al classament. Mas coma res es pas jamai escrit en Superliga, los catalans poguèron pas res contra lo vam anglés e s’inclinèron (14-22). Menats 14-12 a la pausa, los Sang e Aur capitèron pas de capvirar la situacion. De mai, l’arrièr Morgue sortiguèt, nafrat a una cavilha.

Dijòus, es un brave desplaçament que los espèra cò dels campions Saint Helens (una partida que se poirà seguir sus la cadena internet de L’Équipe).

 

…e los londinencs tanpauc

 

Fin de seria tanben en Championship per Tolosa que pèrd a Londres: 22-6. Aqueste dimenge 15, a 6 oras del vèspre, los occitans ensajaràn de tornar trapar los camins de la victòria amb la recepcion dels Dògols de Batley. En jòc: la segonda plaça al classament.

 

Desfaita dels U19

 

A St Gaudenç, lo dissabte 8 de julh, lo XIII de França dels U19, entraïnat per Remi Casty, jogava fàcia als angleses. Cò dels vesitaires, se trapava lo filh de Kevin Sinfield: lo rugbi es un afar de familha. Los angleses menavan 16-4 a la pausa, los Blaus tornèron a 20-22, mas los vesitaires fan la diferéncia en fin de partida per véncer 33-20.

La seleccion dels U17 va prene per sa part la direccion d’Anglatèrra.

 

Austràlia: los Blaus per l’onor

 

En Austràlia, aqueste dimècres 12 de julh, se jogarà la tresena partida de l’State of Origine. Queensland a ja emportat la tièra 2023 mas, a Sydney, los Blaus de Nòva Galas de Sud faràn lo necessari per salvar l’onor.

Cinc partidas compausavan la jornada de campionat NRL, amb d’esquipas privadas dels jogaires seleccionats. Los vesitaires s’arregalèron: dijòus, las Làmias ganhèron cò dels Tigres: 36-12; divendres, Canberra anèt batre Sant Jòrdi: 36-26; dissabte, los neozelandeses marquèron 8 ensages a las Anguialas, batudas 10-46, e, mai susprenent, los Dògols empòrtan la victòria cò dels Lapinons: 36-32.

Dimenge, la partida entre los Titans e los Dalfins s’acabèt, ela, al punt en aur amb una victòria dels Dalfins 23-21.

 

Mudadís al vilatge vesin

 

En Òlt e Garona, al Mas d’Agenés, la comuna balha prioritat al club de fotbòl pels oraris d’entraïnament. Al cap de 50 ans de portar las colors localas, amb sos 120 licenciats, lo club de XIII pren la decision de se mudar dins la comuna vesina de Faugueròlas!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article