La 47a Universitat Occitana d’Estiu, organizada en julhet 2023 per la MARPÒC se debanèt a Nimes a l’Ostal Diocesenc e fuguèt una capitada. Aquest an veguèt aumentar lo nombre de participants que fuguèron cada jorn un centenat presents per se partejar entre conferéncias e talhiers. Lo tèma èra “Vira vira la lenga”, alentorn dei politicas lingüisticas. Un programa ric es de veire sul sit ieo30.org/universitat-occitana-d-estiu-2023.

Lei seradas aculhiguèron de cantadors occitans coneguts mai tanben un grop nascut en 2023: Cabifòl, es a dire Pascal Marconato e Idelette Rochat. Leis aviam ja ausits dins lo DVD de Masc ont cantavan de poèmas de Jòrgi Gròs, l’autor e contaire nimesenc que nos quitèt en 2018. E vaquí un concèrt novèu, "Darrièr la pòrta". De tres parts dos dau concèrt son justament de tèxtes de Jòrgi Gròs, plens de finesa e de poesia o d’umor. Un public nombrós presèt lei cançons e la musica, que fau saupre qu’Idelette jòga de mai d’un instrument e Pascal tanben. Es un grop novèu que podretz descubrir ara que son programats dins d’autrei luòcs.

Es un plaser grand de constatar que la còla de la MARPOC capitèt de reviscolar l’UOE après un confinament nociu! Una jòia tanben d’aculhir un grop novèu que fa viure la lenga occitana e la paraula de mon paire Jòrgi Gròs qu’èra un grand amic d’Idelette e Pascal.

Per mai d’informacions:
Pascal Marconato. Association M.A.S.C. (Mouvement des Arts Sonnants et Chuchotants)
GROPE CABIFÒL
+33(0)6 64 76 50 89
ass.masc30@gmail.com
e sus la pagina Facebook del grop Cabifòl