Es sus las tèrras dels Lops de Warrington que l’esquipa de França U17 a batut per dos còps son omològa anglesa: 26-14 lo dissabte 16, puèi 36-20 aqueste dimècres 19. La question bèla es: cossí contunhar sus aquela dinamica en U19 puèi amb l’esquipa primièra del XIII de França?

Fauta de competicion europèa, la Federacion anóncia pel 23 de decembre una confrontacion entre l’esquipa de França e los Coalas (seleccion de jogaires dels Antipòdes dels clubs d’Elèit 1) e una oposicion amb los Dragons Catalans a la fin de genièr.

Leigh/Hull KR en finala de la Cup

Dissabte, en mièja finala de la Cup, Leigh recebiá Saint Helens. Los Sants marcavan dins lo primièr temps (6-0), mas, aprèp la pausa, los locals marcavan dos ensages, una transformacion e una penalitat per menar 12-6. Los Sants marcavan un ensag a quauquas minutas del tèrme, mas la palma de la transformacion fugissiá los pals. Victòria e qualificacion de Leigh 12-10 . Lo club a jogat e ganhat doas finalas de la Cup: en 1921 (13-0 contra Halifax) e 1971 (24-7 contra Leeds) .

Dimenge, l’autra mièja finala opausava Hull KR e Wigan. Amb un tombat a la primièra minuta e de prolongacions, Hull KR batiá los vesitaires: 11-10.

Hull KR a jogat 7 finalas e n’a ganhada una sola: un dèrbi fàcia a Hull FC en 1980: 10-5.

Rendètz-vos a Wembley per aquela finala inedita lo dissabte 12 d’agost de vèspre.

La setmana passada, en XIII-cadieral, los Dragons Catalans se qualifiquèron per la finala de la Cup que jogaràn lo 26 d’agost fàcia a Leeds. Las 2 formacions acabèron al cap d’un torneg de 7 esquipas.

Salford a Brutus

Aqueste dissabte 29, los Dragons reçaupràn los Diables Roges de Salford a Brutus (a 19h). Devon al public catalan una partida de primièra (genre: la partida a Saint Helens) per faire doblidar la pietadosa oposicion a Huddersfield e tanben per confirmar la primièra plaça del classament.

En Championship, dissabte, Tolosa reçauprà Keighley amb un objectiu afirmat de victòria per consolidar la segonda plaça al classament.

Lo calendièr d’Elèit 1

La Federacion a publicat lo calendièr de la sason d’Elèit 1. Son las 10 meteissas formacions que disputaràn la sason novèla que se dobrirà la dimenjada dels 30 de setembre e 1r d’octòbre.

Nòu formacions jogaràn lo campionat d’Elèit 2: Palau, campion de Nacionala, remplaça Baó que pòt pas seguir financièrament. Uèit formacions jogaràn lo campionat femenin d’Elèit 1.

NRL: los Cavals petnejan

Dins lo campionat australian, dijòus, los Dragons avián batut los Tigres: 18-14. Divendres, los Cavals son anats tirar las aurelhas dels Lapinons: 36-14 . Lo rescontre neo-zelandeses/Canberra va fins al punt en aur e Shaun Johnson ensaca lo tombat de la victòria kiwi: 21-20. Dissabte, los Polets van batre los Titans 36-18. Newcastle, menat 12-0 en debuta de partida, se repren per batre Melbourne 26-18. Los Vaquièrs mestrejan las Anguialas 24-16.

Dimenge, las Pantèras baton aisidament los Dògols 44-18. Manly mena 30-0 a Cronulla e resistís al retorn de las Làmias: 30-26!