Lo temps es al bèl pels catalans. Dissabte de ser, los sostens poguèron seguir una partida de sens unic fàcia als Diables Roges de Salford. A la pausa, menavan 22-0. Los tres primièrs ensages foguèron marcats aprèp de còps de pè a ras de pelena dins l’esquina de la defensa anglesa. Dins lo segond temps, Sam Tomkins amb una penalitat, un ensag e sa transformacion, arribèt a 1500 punts de marcats dins sa carrièra professionala: 398 punts marcats pels Dragons, 954 amb Wigan, 56 amb los New Zealand Warriors e 92 per Anglatèrra! Fin finala, los catalans ganhèron 42-0.

Coma, de vèspre, Wigan aviá batut Leigh 44-18, vaquí los Sang e Aur en cap de classament amb 4 punts d’avança suls dos clubs. Una bona causa dins la perspectiva de clavar la primièra fasa a una de las primièras 2 plaças, sinonimas de mièja finala a domicili.

An ganhat las partidas d’aquesta vintena jornada: Huddersfield (19-12, fàcia a Hull FC), St Helens (22-18 fàcia a Leeds), Hull KR (34-16 fàcia a Castleford). Dimenge, Wakefield estrilha Warrington 42-6.

Wakefield es a la luta amb Castleford per evitar la davalada en Championship: las 2 formacions se venon de refortir dins aquesta perspectiva. Las 2 se trapan amb 8 punts e una leugièra diferéncia de punts en favor dels Tigres per ara: mens 274 contra mens 296 (aitant dire: pas grand causa!)

Divendres, los Sang e Aur jogaràn a Warrington qu’es pas, vista aquela desfaita, al melhor: mas un lop se pòt desrevelhar a tot moment! La partida se poirà seguir en dirècte sus la cadena internet de L’Équipe.

Championship: Tolosa cartona

A Ernèst Wallon, novèla larga victòria pel Tolosa Olimpic: 64-0 fàcia a Keighley .

Dissabte, Tolosa se desplaçarà a York abans de deslocalizar doas partidas: lo dissabte 19 d’agost a Carcassona per rescontrar Swinton e lo dissabte 26 d’agost a Albi per jogar fàcia a Barrow.

NRL: la cauma del lògo

En Austràlia, los jogaires an un conflicte sus lor remuneracion amb l’NRL; consequéncia: jògan la partida amb lo lògo NRL amagat sul malhòt!

Los dos primadièrs an ganhat: 32-10 pels Cavals Fòls fàcia als Polets e 28-0 per las Pantèras fàcia a las Làmias .

Tres formacions ganhan al defòra: los Lapinons (32-18, cò dels Tigres), Newcastle (28-6 a Canberra), Manly (24-18 a Sant Jòrdi). Melbourne es plan mai fòrt que las Anguialas: 46-16. Los Titans mestrejan los Vaquièrs: 22-13. Los Dògols baton los Dalfins d’un punt: 23-22.

Demòran cinc jornadas per clavar la fasa de classament e la batèsta demòra bèla per faire partida dels uèit qualificats per la fin de sason. Alara que Pantèras, Cavals Fòls, neozelandeses, Melbourne e Canberra son en camin per la qualificacion, Lapinons, Làmias e Vaquièrs (26 punts) devon comptar amb la menaça de Newcastle e Manly (25 punts) e de las Anguialas (24 punts). Caldriá una tièra bèla de victòrias als Polets, als Titans e als Dalfins (22 punts) per se qualificar.