Bandièra01 1180x150: La Passem

Actualitats

Internacional

Nigèr: una delegacion de la CEDEAO cèrca d’establir de negociacions de patz après lo putsch

França es inquieta e crenh de recebre pas d’urani per son energia nucleara

Tèxte legit

Una delegacion de la Comunautat Economica de l'Africa Occidentala (CEDEAO) se gandiguèt ièr dimècres a Niamey, la capitala de Nigèr, per ensajar d’establir de negociacions de patz après lo recent còp d'estat qu’a afectat lo país african. La delegacion la dirigís l’ancian cap nigerian Abdulsalami Abubakar e i es present lo sultan de Sokoto en Nigèria, Muhammadu Saadu Abubakar, un cap religiós presat.

La decision d’i mandar una delegacion se prenguèt après la cima extraordinària de la conferéncia dels caps d'estats e de govèrns de la CEDEAO a prepaus de la situacion politica en Nigèr, qu’aguèt luòc dins la capitala de Nigèria, Abuja. En responsa al còp d'estat en Nigèr, la CEDEAO impausèt de sancions qu'incluson lo barrament de las frontièras aerianas e terrèstras entre Nigèr e los païses de son entorn e tanben l’enebicion de subrevòl de l'espaci aerian pels avions sortits o a destinacion de Nigèr.

D'autre latz, los govèrns de Burkina Faso e Mali an exprimit lor chepic e considèran que tota intervencion en Nigèr serà interpretada coma una declaracion de guèrra.

 

Chepic en França

 

L’estat francés a repatriats sos ciutadans que demoravan en Nigèr, mas ça que la i a daissats los 1500 militars franceses.

Lo còp d'estat a chepicadas las autoritats francesas qu’an paur que Nigèr reduga sas importacions d’urani, çò que poiriá empachar la produccion d’energia nucleara.

 

 

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

Ajustarai que la soleta causa que permeta una utopica "independéncia energetica" en tot salvar la planèta, son ecosfèra, la beutat e l'armonia dels païsatges, aquò es de non aver mai besonh d'energia. Òr lo mòde de vida occidental es particularament energivòra.

Alavetz, qué farem ?

Qué farem de grat ?

Qué farem de fòrça ?

  • 0
  • 1
Franc Bardòu
1.

"L’estat francés a repatriats sos ciutadans que demoravan en Nigèr, mas ça que la i a daissats los 1500 militars franceses. Lo còp d'estat a chepicadas las autoritats francesas qu’an paur que Nigèr reduga sas importacions d’urani, çò que poiriá empachar la produccion d’energia nucleara." Aquí tota la question-clau qu'explica la politica françafricana de sosten (militari) a unes dictators intolerables (al plan etic), o a unes corrents de contestacion a d'autres dictators, non mens intolerables (al plan etic). De l'etica, los govèrnaments se'n chautan ben pro. Sostenon qui los sosten, e los sosten qui lor procura matèrias primièras (urani, per exemple) a de còstes plan basses — relativament a çò que ne lor costariá, los espleitèssen dirèctament en Euròpa de l'Oèst (ont mantas minas an tampat, coma o sabèron los "carbonièrs de La Sala" que nòstre Joan Bodon a immortalizats). Los espleitats africans natius, sense cap de dreits ni de sindicats per los defendre en Africa còstan plan mens car…

Comprenètz ben qu'un corrent "revolucionari" que voldriá simplament veire pagat e respectat qui trebalha pel trebalh aital complit seriá absoludament insostenible al regard de França (sos govèrnaments, entendi). Encara qué… Los govèrnaments sonque ?

Qui d'entre nosautres es dispausat a pagar l'energia nucleària quatre còps mai car que çò que la pagam ja (e non parli pas del procediment de gavatge financièr que pagam ja als accionaris) ?

Un govèrnament revolucionari en França poiriá eventualament decidir de non pagar mai cap accionari que siá — se vòlon d'argent, non an que de lo s'anar ganhar en trebalhant… — e de començar de pagar lo trebalh dels extractors de matèrias primièras — los obrièrs africans, entendi. Pagar lo trebalh d'unes Africans mai que de pagar las rendas de gents parasitàrias (europèas o autras), aquò, si qu'es revolucionari e anti-colonialista. Mas… ne sèm encara luènh.

  • 1
  • 1

Escriu un comentari sus aqueste article