En debuta de sason, los Lops de Warrington senhorejavan sus la Superliga: uèit de las primièras nòu partidas ganhadas, victòrias a Perpinhan pel compte de la competicion e en Cup. Mas, l’estiu vengut, los Lops son a l’arrèst: an davalat a la cinquena plaça; la desfaita a Wakefield a menat la direccion a se separar de l’entraïnaire.

Divendres de ser, los Lops sostenguèron pas la comparason amb los Dragons que marquèron tres ensages dins lo primièr temps (18-6 a la pausa) e dos dins lo segond per emportar la victòria: 30-10.

Los tres seguents dels Dragons an tanben ganhat: Leigh ganha a Leeds: 13-6; Wigan atomiza Hull KR qu’aviá lo cap virat cap a la finala de la Cup: 64-6. De mai, St Helens, qu’a ganhat a Salford 18-15, pòt ragantar e doblar aqueles dos clubs s’empòrta la partida en retard aqueste dimenge fàcia a Huddersfield.

Malgrat l’arribada de refòrts, Castlefòrd es batut per Huddersfield: 0-28 e se separa de son entraïnaire. Wakefield demòra darrièr aprèp la desfaita cò d’Hull FC: 42-4.

Lo dissabte 19 d’agost, los catalans aniràn a Leigh abans de reçaupre Wigan lo 26.

Finalas de Cups a Wembley

Aqueste dissabte 12 d’agost, las Copas de XIII seràn a l’onor a Wembley:

• d’en primièr, la finala de la Copa femenina entre Leeds e St Helens
• la granda finala inedita entre Hull KR e los Leopards de Leigh
• la finala de la 1895 Cup (copa dels clubs de Championship e Liga Un) entre Halifax e Batley per clavar la vesprada.

Championship: una lesca de cambajon per Tolosa

Lo Tolosa Olimpic jogava a York. Ne torna amb una victòria que foguèt longa a se dessenhar: 18-14, mas que permet als occitans de servar la segonda plaça d’aitan mai que Bradford va ganhar a Batley 42-6 e que Whitehaven bat Sheffield: 32-20. Aquò balha a Tolosa 4 punts d’avança sul tresen e sul quatren abans las partidas deslocalizadas a Carcassona fàcia a Swinton lo dissabte 19 d’agost e a Albi fàcia a Barrow lo dissabte 26 d’agost.

NRL: Penrith e Brisbane, primièrs qualificats

A 4 jornadas de la fin de la fasa de classament, matematicament, Penrith e Brisbane an ja validat lor qualificacion per las pelhòfas. Penrith domina Melbourne: 26-6 . Brisbane va batre los Vaquièrs: 30-14. Los neozelandeses, venceires cò dels Titans 28-18, son plan estacats a la tresena plaça. Canberra se vei las pèiras per batre los darrièrs, los Tigres: 22-18.

Los Polets se balhan de darrièras rasons d’esperar la qualificacion en batent Manly 26-16, mas per ara puntan en dotzena posicion e cal dintrar dins los primièrs uèit! Es pas fait!

Las Copas del Mond en 2026

Recampada a Singapor, la federacion internacionala a decidit d’organizar tres Copas del Mond en 2026 aprèp l’anullacion del projècte en França de 2025.

Lo nombre dels participants a la competicion masculina serà redusit a dètz. Coma los quarts-de-finalistas de 2022 son qualificats automaticament, demòran doas esquipas de designar: aquò vòl dire que los franceses se deuràn qualificar per èsser del viatge.

Se tendràn tanben, amb 8 participants, las competicions femenina e de XIII-cadieral. La Copa masculina seguenta se debanarà en 2030. Una Copa femenina serà organizada en 2028 per reconéisser lo desvolopament de la practica.

La federacion internacionala nòta la flaquesa de l’organizacion dels rescontres internacionals (“nòstre talon d’Aquiles”, çò ditz) e prepara un calendièr de torneges per zònas geograficas e incita a la represa de las viradas.