Bandièra01 1180x150: País Invisible

Actualitats

Eqüator: assassinan un candidat a la presidenciala en plen miting

L’eleccion se tendrà totjorn lo 20 d’agost mas jos l’estat d’urgéncia

Tèxte legit

L’Eqüator es, dempuèi dijòus passat, en estat d’urgència. Lo president Guillermo Lasso l’a decretat pendent dos meses après l’assassinat del candidat a la presidenciala Fernando Villavicencio, fusilhat dimècres passat just après un miting a Quito a qualques jorns de l’eleccion.

Après una reünion d’urgéncia amb lo gabinet d’estat, Lasso informèt que l’eleccion se tendriá lo 20 d’agost coma èra previst, mas amb un desplegament de militars jos l’estat d’emergéncia, çò qu’implica la suspension de qualques dreches fondamentals coma la libertat de reünion e l’inviolabilitat del domicili.

Lasso a tanplan confirmat la detencion d’almens sièis suspèctes que son estats arrestats “pendent d’escorcolhs executats” dins dos districtes de Quito mentre que l’enquista contunha.

A mai, s’es decretat tres jorns de dòl nacional per onorar la memòria de Villavicencio. “Es un crime politic que podèm qualificar de terrorista e dobtam pas que siá un assag de sabotatge del procès electoral”, çò declarèt Lasso en tot soslinhar “qu’es pas una coïncidéncia qu’aquel atac se siá produch qualques jorns abans lo primièr torn.

Fernando Villavicencio assegurava que l’Eqüator èra vengut “un narcoestat”, e prepausava de restablir la seguretat amb las fòrças armadas e la polícia per carrièras, e parallèlament que s’entreprenguèsse una lucha contra çò que lo politician assassinat apelava la “màfia politica”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article