Aqueste dissabte, Wembley recebiá 60 000 espectators per las finalas de las Cups de la Rugby League. En dobertura, Saint Helens emportava la Cup femenina fàcia a Leeds: 22-8 . Per clavar, Halifax, ont jòga lo provençal Loís Joffret (marcaire d’una transformacion e de tres penalitats), s’entornava amb la 1895-Cup aprèp sa victòria 12-10 sus Batley que mancava a la darrièra minuta la transformacion per anar en prolongacions.

La Cup istorica, que nasquèt en 1896, pren lo camin de Leigh aprèp una partida plan disputada, qu’anèt fins al punt en aur. Dins lo primièr temps, cada esquipa marcava un ensag transformat, mas Hull KR ajustava una penalitat e Leigh, doas. Hull KR egalizava tre la represa, mas Leigh marcava un ensag transformat. Sus la còrna, Hull KR tornava a 16-16. Ne caliá passar pel punt en aur: lo tustaire d’Hull mancava un tombat, alara que Lachlan Lam l’ensacava; victòria de Leigh 17-16.

Preparar 2024

Per ara, los Dragons son primadièrs en Superliga. Mas demòran jos la menaça dels perseguents: Wigan (segond), Saint Helens (tresen, aprèp la victòria contra Huddersfield aqueste dimenge dins una partida en retard: 32-18) e Leigh (quatren) a 4 punts. Doas partidas contra aqueles clubs venon: aqueste dissabte 19, los catalans jògan a Leigh e dissabte 26 reçaupràn Wigan. Lor i demorarà d’anar a Hull KR (lo 1r de setembre), a Wakefield (lo 8) e a Salford (lo 22) per una sola recepcion a Brutus: Leeds (lo dissabte 16).

Lo club prepara ja la sason 2024. Aqueste divendres, s’anoncièt la signatura de l’enfant de Pià: Tèo Fages que partiguèt en Anglatèrra per Salford alara qu’èra just junior, que ganhèt de trofèus amb Saint Helens (3 de Superliga, un doblat) abans de jónher Huddersfield. Serà tanben catalan l’an que ven lo pilar tongan d’Hul FC: Chris Satae. Se sap ja que lo Sam Tomkins prendrà sa retirada de las pelenas, mas demorarà dins l’enquadrament. Son per partir: lo pilar Taukehiaho de retorn en Austràlia e que s’es pas gaire vist jogar entre suspensions e nafraduras; retorn en Austràlia considerat tanben per Mitchell Pearce; Tiaki Chan e Adam Keighran portaràn las colors de Wigan; Mickael Goudemand tornarà trapar Justin Sangaré a Leeds .

La valsa dels entraïnaires

Es pas una plaça segura la d’entraïnaire d’un club esportiu. Castleford, qu’es a lutar amb Wakefield per evitar la davalada en Championship, se ven de separar d’Andy Last aprèp la desfaita 0-28 fàcia a Huddersfield. An embauchat l’entraïnaire de Londres, Danny Ward, alara que s’anóncia la partida “de la mòrt”: l’afrontament amb Wakefield aqueste divendres 18.

Cò dels Lops de Warrington s’es pas gaire apreciada la tièra de desfaitas e en particular lo 6-42 encaissat a Wakefield: exit Daryl Powell e se parla de Sam Burgess, per ara dins l’enquadrament dels Polets de Sydney, per lo remplaçar.

Mai original: cò de Featherstone, cap de fila del Championship, los dirigents son pas contents de la segonda desfaita de la sason fàcia a Halifax. Aquò correspond pas a lor ambicion de pujada en Superliga. Son adjunt, qu’arribava de Wakefield: James Ford, es investit de la carga.

NRL: los neozelandeses en pelhòfas

Amb la victòria 30-22 cò dels Tigres, la formacion neozelandesa assegura sa qualificacion per las fasas finalas. Los primadièrs ganhan aisidament: Penrith ganha a Manly 24-12 e Brisbane domina las Anguialas 54-10 . Victòrias bèlas tanben de Newcastle fàcia als Dògols: 42-6 e de Melbourne fàcia a Canberra: 48-2

A la conquista de las Americas

La NRL ven d’anonciar que doas partidas de la primièra jornada del campionat 2024 NRL se jogarà a… Las Vegas. Las esquipas concernidas son: los Lapinons, los Polets, los Cavals Fòls e las Aglas de mar.