Bandièra01 1180x150: País Invisible

Actualitats

crotz-tolosaCreated with Sketch.GuianaAgenésNaut Agenés

A començat l’Escòla Occitana d’Estiu amb un recòrd de participacion

Del 13 al 19 d’agost, una centena e mièja d’estagiaris participan a la transmission e al mantenement de l’occitan a Vilanuèva d’Òlt

Pels mai pichons, i a l’Escoleta, amb d’activitats per enfants de 5 a 9 ans, e per lo jovent d’10 a 16 ans i a l’Escòla dels Adolescents (dicha “Escòl’Adòs”)
Pels mai pichons, i a l’Escoleta, amb d’activitats per enfants de 5 a 9 ans, e per lo jovent d’10 a 16 ans i a l’Escòla dels Adolescents (dicha “Escòl’Adòs”) | Tomàs Hirondelle

Tèxte legit

Comencèt dimenge passat a Vilanuèva d’Òlt (Naut Agenés) la 49a edicion de l’Escòla Occitana d’Estiu (EOE) amb un recòrd de participacion. Una centena e mièja de participants ocupan tot l’espaci d’albergament del licèu qu’aculhís l’EOE, e fòrça campan sus la pelena. Totes son aquí per participar a aquel eveniment màger per la transmission e lo mantenement de nòstras lenga e cultura que prepausa fins a dissabte, 19 d’agost, de corses de lenga occitana a totes los nivèls en lengadocian, gascon e lemosin, e tota una tièra d’activitats: d’obradors, de conferéncias, d’espectacles, de danças, de descobèrtas del terrador e una librariá completa de libres en lenga nòstra. Demest los divèrses espectacles de cada serada, i aurà uèi dimècres un balèti de Castanha e  Vinovèl.

Los participants son de costuma d’occitans que venon de per tot lo país, seguits per un grop de catalans plan nombroses. Al delà, i a de mond de païses ben divèrses.

A l’EOE, i a de mond de totas las edats, çò que fa venir passionants los escambis entre dialèctes e generacions, mai que mai en tot beure un còp a l’estanquet, a la fin de la jornada, abans lo balèti o l’espectacle.

Pels mai pichons, i a l’Escoleta, amb d’activitats per enfants de 5 a 9 ans, e per lo jovent d’10 a 16 ans i a l’Escòla dels Adolescents (dicha “Escòl’Adòs”).

Coma d’abitud, lo Comitat d’Afrairament Occitanocatalan (CAÒC) i serà, en tot portar fòrça participants e collaborar activament a l’organizacion de l’eveniment.

Divendres que ven, l’EOE la clavarà una fèsta occitanocatalana en vila, al mercat dels terradors, amb un concèrt-balèti menat per los musicians de Thouzaxun.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article