La Cort Suprèma de Chile a emés sa senténcia definitiva per la secrestacion e l’omicidi del cantador e activista politic Víctor Jara e del director de presons e militant comunista, Littré Quiroga Carvajal, en setembre de 1973, durant lo còp d’estat d’Augusto Pinochet. Lo tribunal a confirmat la condemnacion de sèt militars retirats a vint e cinc ans de càrcer.

A dos setmanas de la commemoracion del 50n anniversari del còp d’estat d’Augusto Pinochet, la Cort Suprèma a ratificat en despièch d’un recors la senténcia de la Cort d’Apelacion de Santiago, e a escartat que i aja qualque error en la condemnacion.

Los condemnats son Raúl Jofré González, Edwin Dimter Bianchi, Nelson Haase Mazzei, Ernesto Bethke Wulf, Juan Jara Quintana e Hernán Chacón Soto, que deuràn complir quinze ans e un jorn de preson en qualitat d’autors dels omicidis, e dètz ans e un jorn per las sequestracions. A mai, Rolando Melo Silva aurà de complir cinc ans e un jorn de càrcer per aver cobèrt los omicidis, e tres ans e un jorn per aver ocultat las sequestracions.

Durant lo còp d’estat bailejat pel general Pinochet contra lo president Salvador Allende, l’11 de setembre, Jara e d’autres activistas foguèron menats per fòrça  a l’Estadi de Chile, ont foguèron torturats pendent d’oras e assassinats.

En 2016, un tribunal dels Estats Units declarèt colpable l’èx-militar chilen Pedro Barrientos de torturas e de l’execucion extrajudiciària del cantador Víctor Jara, en seguida d’una denóncia civila de sa familha. Los jutges obliguèron lo condemnat de pagar una compensacion per damatges e prejudicis.

Un militar condemnat se suicida

Un dels militars condemnats, Hernán Chacón Soto, d’86 ans, s’es suicidat quand la polícia l'èra anada cercar per executar la senténcia. Chacón Soto èra estat condemnat a 25 ans de preson per son implicacion dins la sequestracion e la mòrt del cantador chilen, e mai èra dirèctament implicat dins los interrogatòris de l'Estadi de Chile. Es pas lo primièr còp que qualqu’un que participèt al putsch de Pinochet se suicida per evitar la preson.