Jol lèma “reconeisserem pas los que nos reconeisseràn pas”, lo Naut Conselh dels Amazighs de Libia a cridat los ciutadans d’At Willul a la desobesissença civila, segon Tamazgha.fr. Dins una primièra estapa prepausan d’accions pacificas mas escartan pas d’actes de fòrça, quitament armats, se lo Congrès Nacional e lo govèrn renóncian pas a lors actituds discriminatòrias. Dins aquel sens, los combatents amazighs an fach saber que son dispausats a sacrificar lors vidas per lor identitat e per lors dreches coma pòble. An fach tanben una crida a la solidaritat als arabis e als arabofòns de Libia.
 
Lo Naut Conselh dels Amazighs de Libia exigís una constitucion que consagre lo drech de ciutadaniá e la legalitat. “Totes sèm libians e a totes nos cal aver los meteisses dreches e devers”, an cridat en manifestacion. Reclaman de mai que totes los amazighs dels diferents estats nòrd-africans jongan las fòrças per “n’acabar amb l’umiliacion que los regims araboislamistas lor impausan”.