Bandièra01 capçalera  1180x150: Botiga

Actualitats

Rugbi de XIII: pels Dragons, victòria imperativa a Salford

 Divendres, lo capitani dels Warriors fasiá la una del ‘New Zealand Herald’
Divendres, lo capitani dels Warriors fasiá la una del ‘New Zealand Herald’ | Charly Triballeau / AFP

Tèxte legit

En Superliga, caldrà esperar la darrièra jornada de la fasa de classament per saupre lo programa de las pelhòfas.

A Brutus, los catalans an regalat lo public: cinc ensages per mièg temps per una victòria 61-0 fàcia a Leeds. Son segonds amb un avantatge de +62 sus Saint Helens. Cal anar ganhar a Salford en esperant que los Sants passen pas 80 punts a Hull FC. E perqué pas somiar de la primièra plaça se ven a Leigh la bona idèa de batre Wigan!

 

Tolosa ten pas la distància

 

Dissabte, lo TO recebiá als Minims los primièrs: Featherstone. Los occitans menavan 16-12 a la pausa, mas al còp de fiulet final, la victòria veniá als angleses: 29-16. Demòra una partida de jogar a Whitehaven, puèi cal esperar la mièja finala a Ernèst Wallon lo 7 d’octòbre, la ganhar e jogar finala e montada en Superliga!

 

Logica respectada en NRL

 

Los primièrs 4 del classament jogaràn las mièjas finalas que se sonan finalas preliminaras en Austràlia. Divendres, a Melbourne, los Polets pensèron plan de tornar ganhar 13-12, mas encaissèron un ensag a la darrièra minuta: desfaita 13-18.

Dissabte, a Auckland, los neozelandeses balhèron la leiçon a Newcastle e signèron una larga victòria: 40-10.

Las mièjas finalas veiràn Penrith reçaupre Melbourne e los neozelandeses vesitaràn Brisbane.

 

Tròp fòrts, los policièrs australians!

 

Divendres, al Molin de Lesinhan, se joguèt una partida entre la seleccion dels policièrs de Nòva Galas del Sud e una seleccion de policièrs municipals d’Occitània. Sus la pelena, los jogaires de l’emisfèri sud se mostrèron los mai fòrts: 48-0, mas las causas s’equilibrèron al moment del tresen mièg temps!

Aquesta dimenjada, a Sant Llorenç de Salanca, las 19 formacions d’Elèits 1 e 2 entamenaràn la sason amb un torneg de rugbi de IX.

Dimenge, a Belgrad, una esquipa de França rescontrarà la formacion nacionala sèrba.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article